Sondaı-aq 5 býkmekerlik keńse men 2 totalızatordyń lısenzıasy toqtatyldy
QR MSM Týrızm ındýstrıasy komıtetiniń habarlaýynsha, onlaın kazınolardy anyqtaý jáne buǵattaý boıynsha júrgizilgen jumystardyń arqasynda jyl basynan beri elimizde 3 670 ınternet-kazıno buǵattaldy, dep habarlaıdy Almaty-akshamy.kz.
Sondaı-aq sot sheshiminiń negizinde 5 býkmekerlik keńse men 2 totalızatordyń lısenzıasy toqtatyldy. Buǵan lısenzıalyq alymdy tóleý boıynsha qaryzdar, oıyn aımaqtarynan tys tirkeý, mindetti rezervtiń bolýy boıynsha talaptardy oryndamaý jáne basqa da zańbuzýshylyqtar negiz boldy, -dep jazdy Azattyq Ruhy.
2022 jyly Komıtet 4 oıyn avtomattary zalyna qatysty jospardan tys tekserýler júrgizgen bolatyn. Tekserý nátıjeleri boıynsha 1 zal jabylyp, lısenzıasynan aıyryldy, 3 zaldyń qyzmeti toqtatyldy jáne 6 ákimshilik aıyppul salyndy.
«Jasyratyny joq, onlaın-kazınolar jáne, atap aıtqanda, olardyń jarnamalary ońaı jeńiske jetýge ýáde beredi jáne qumar oıynshylardan aqsha tabýǵa tyrysady. Buǵan qarsy turý úshin biz ınternette monıtorıń júrgizemiz jáne qoldanystaǵy lısenzıalardy tekseremiz. Mysaly, 4 býkmekerlik keńseniń, 3 totalızatordyń jáne 1 oıyn avtomattary zalynyń lısenzıalaryn joıý jumystary júrgizilip jatyr», - dep atap ótti Mádenıet jáne sport vıse-mınıstri Erjan Erkinbaev.
2019 jyly elde ınternet-resýrstardy monıtorıńileý úshin «Kıbernadzor» aqparattyq júıesi iske qosyldy. Bul birden birneshe memlekettik organdarǵa, sonyń ishinde Mádenıet jáne sport mınıstrligine ınternet-kazınolardy jedel anyqtaýǵa jáne olarǵa kirýge tyıym salýǵa múmkindik beredi. Bul rette Aqparat jáne qoǵamdyq damý mınıstrligimen birlesip anyqtalǵan ınternet-kazınolardy buǵattaý týraly aqparatty qaraý merzimin qysqartý jóninde sharalar qabyldandy.