Derekter muraǵattan alynǵan
Almatyda Saıası qýǵyn-súrgin qurbandaryn eske alý kúnine oraı "Ustaz ben shákirt" kitabynyń tusaýkeser rásimi ótti. Jınaqta zańǵar jazýshy Muhtar Áýezov pen abaıtaný ǵylymynyń negizin salýshy Qaıym Muhamedhanovtyń arasyndaǵy rýhanı baılanys kórinis tapqan, dep habarlaıdy Almaty-akshamy.kz.
Eńbek avtory - Qaıym Muhamedhanovtyń qyzy Dına Muhamedhan. Derekter muraǵattan alynǵan. Rasynda qos tulǵa ustaz ben shákirt uǵymynyń jarqyn úlgisin kórsetti. Ómirlerine qaýip tóngenine qaramastan qazaq halqynyń joıylyp kete jazdaǵan ulttyq murasyn saqtap qaldy. Atap aıtsaq, 18-20 ǵasyrlardaǵy kanondyq mátinderden bastap, epos pen fólklordy keıingi urpaqqa amanattady. Oǵan qosa, Abaı mektebi men mátintaný sıaqty ǵylymnyń jańa baǵytyn ashty. Qaıym Muhamedhanov Abaıdyń tuńǵysh murajaıyn quryp, "Abaı-Alash" tujyrymdamasyn jasady, dep habarlady "Habar 24".
"Áýezovti kórsetseń, seniń ǵylymı eńbegiń de saqtalady, bolashaǵyńa keń jol ashylady degenge qaramaı, adaldyq tanytyp, sol zamanda 50-shi jyldary qorǵaǵan eńbegin qaıtadan tárk etkizip, sol kezdegi saıasattyń áserimen 25 jylǵa bas bostandyǵynan aıyrylyp, Karlagta Qaraǵandy lagerinde ótkizdi. Stalın ómirden ótkenshe 4-5 jyl ómirdiń azabyn kórgen kisi", - deıdi jazýshy Dáýlet Seısenuly.
"Úlken bilim jolyna túsken adamdardyń, solardyń arasyndaǵy ustazdyq shákirttik qatynas, ony bilýimiz kerek. Bilim degen ol-aqıqatqa, ádilettilikke jol izdeý. Qaıym Muhtar aǵasyna zamandas bola bildi, izbasar bola bildi", - deıdi memleket jáne qoǵam qaıratkeri Murat Áýezov.