Naýqanǵa qaladaǵy 11 mektepten 40-qa jýyq oqýshy qatysty
Elimizde jyl saıyn 4,5 mln tonna turmystyq qaldyq shyǵarylady. Sonyń shamamen nebári 25 paıyzy ǵana qaıta óńdeledi desek, qalǵany qoqys polıgondarynyń aýmaǵyn keńeıtip otyr. Sebebi suryptaý kásiporyndary barlyq aımaqta joq. Bul jaıynda Ekologıa jáne tabıǵı resýrstar mınıstrligi málimdedi, dep habarlaıdy Almaty-akshamy.kz Almaty.tv-ge silteme jasap.
2030 jylǵa deıin qaıta óńdeletin qaldyqtardyń úlesin 40 paıyzǵa jetkizý mindeti tur. Al Almaty turǵyndary 1 jyl ishinde 460 myń tonnaǵa jýyq qoqys tastaıdy eken. Olardy suryptaıtyn Alataý aýdanyndaǵy eń úlken zaýyt táýligine qansha tonna qaldyqty qaıta óńdeýge qaýqarly?
Jylyna 550 myń tonna qoqysty suryptap, óńdeýge qýaty jetetin zaýyt táýligine 1200 tonna turmystyq qaldyq qabyldaıdy. Mekeme Alataý aýdanynda ornalasqan. 200-den asa qyzmetker jumys isteıtin zaýyt qala qoqysynyń 75 paıyzyn qamtıdy. Ol úlken 3 bólikten turady. Birinshisi - qabyldaý bólimi, onda kereksiz zattar jınalady. Ári qaraı qoqys suryptalyp, syǵymdalý úshin ekinshi bólikke túsedi. Sońǵysy – qoıma. Al óńdeýge jaramaıtyn azyq-túlik, qurylys materıaldary, aǵash butaqtary men tehnıka sıaqty qaldyqtar bólek shyǵarylyp tastalady.
Oqý jyly bastalǵaly almatylyq oqýshylar dál osy zaýytqa 1,5 myń tonna qaldyqty qaıta óńdeýge tapsyrǵan. İs-shara qala ákimdigi muryndyq bolǵan «Jasyl mektep» aksıasy aıasynda júzege asty. Atalmysh joba bilim oshaqtarynyń ishinde eko-belsendiler tobyn qurýǵa baǵyttalǵan. Uıymdastyrýshylar sol arqyly mektepter eko-habqa aınalýy múmkin deıdi.
– Maqsatymyz – óskeleń urpaqqa ekologıalyq ómir saltyn túsindirý, áleýmetti aǵartý jumystarymen aınalysý. Qarapaıym qadammen qorshaǵan ortany qalaı qorǵaýǵa bolatynyn túsindirip, dárister ótkizdik, – dedi joba uıymdastyrýshysy Erasyl Áshimbaı
«Jasyl mektep» jobasy byltyr bastaý alǵan. Bıyl bul naýqanǵa qaladaǵy 11 mektepten 40-qa jýyq oqýshy qatysyp, belsendiligi úshin kózge túsip te úlgerdi. Olar oqý jyly barysynda ózara eko-festıvalder ótkizip, taqyryp aıasynda ıýtýb-arnalaryn qurdy.
– Biz mektepte túrli ekobokstar ótkizdik. Sol arqyly bilim alyp, ekologıalyq mádenıetimizdi damyttyq, – dedi oqýshy Kámılá Ómirzaq
Joba kelesi oqý jylynan bastap aýqymyn keńeıtpek. Almatylyq bilim oshaqtarynyń 100 paıyzyn qamtý – joba uıymdastyrýshylarynyń maqsaty. Tabıǵat janashyrlarynyń aıtýynsha, ekologıalyq mádenıetti qalyptastyrý mektepten bastalady.