Máslıhattyń kezekten tys XVI sesıasynda depýtattar qatty turmystyq qaldyqtardy (QTQ) jınaýǵa, tasymaldaýǵa, suryptaýǵa jáne kómýge arnalǵan tarıfterdi bekitti, dep habarlaıdy almaty-akshamy.kz
Esepteýlerge sáıkes jyldyq tarıf 1 m3 qaldyq úshin 3 309 teńgeni qurady, aılyq tarıf bir adamǵa aıyna 718,5 teńgeni qurady. Ortasha statısıkalyq páterler úshin komýnaldyq qyzmetterdiń tólem somasy QTQ shyǵarý tarıfi kóterilse orta eseppen 1,4%-ǵa artady.
Áleýmettik kómek kórsetý qaǵıdalaryna sáıkes halyqtyń áleýmettik osal toptaryna (HÁOT) ataýly áleýmettik kómek kórsetiledi. Komýnaldyq qyzmetterge jumsalǵan shyǵystardy óteý úshin 2024 jyldyń 1 mamyrynan bastap HÁOT sanatyndaǵy 315 430 turǵynǵa 0,05 AEK (184,6 teńge) kóleminde ataýly áleýmettik kómek tólenetin bolady.
Qoldanystaǵy tarıfter Almaty qalasy máslıhatynyń 2017 jylǵy 15 qyrkúıektegi №146 sheshimimen bekitilgen bolatyn. 2017-2023 jyldar aralyǵynda naryq qatysýshylary (qoqys shyǵaratyn uıymdar, qoqys suryptaıtyn kásiporyndar jáne polıgon operatory) shyǵyndardyń aıtarlyqtaı óskenin atap ótti. QTQ shyǵarý tarıfi konteınerlik alańdardan qaldyqtardy jınaý jáne olardy qoqys suryptaý kásiporyndaryna tasymaldaý, qaldyqtardy suryptaý, paıdaly fraksıalardy odan ári qaıta óńdeýge shyǵarý, polıgonǵa kádege jaratpaıtyn fraksıalardy tasymaldaý, polıgonda qaldyqtardy qabyldaý jáne olardy kómý boıynsha shyǵystardy qamtıdy. Bul rette 2017 jyldan bastap ortasha jalaqy 2 esege, dızel otynynyń ortasha quny 3 esege ulǵaıdy, arnaıy tehnıkanyń qosalqy bólshekterine shyǵyndar ósti.
Qazirgi ýaqytta Almaty ákimdigi QTQ jınaý jáne ony shyǵarý úshin ınfraqurylymdy sapaly jańǵyrtý jumystaryn jalǵastyrýda. 2024-2025 jyldary 671 konteıner alańynda 2 905 tereńdetilgen konteınerdi aýystyrý jáne ornatý josparlanǵan. 2024 jylǵy qańtarda GPS-trekerlermen jaraqtandyrylǵan zamanaýı arnaıy tehnıkanyń, qaldyqtardy suryptaýǵa arnalǵan sharttardyń, tehnıkany jańartý jónindegi ınvestısıalyq baǵdarlamalar boıynsha qatysýshylarǵa qoıylatyn talaptarmen 5 jyl merzimge QTQ shyǵarýdaǵy ashyq tender ótkizildi.