Almatyda jańa redaksıadaǵy úı ıeleri úshin komýnaldyq qaldyqtardyń túzilýi men jınaqtalýynyń eseptik normalary bir turǵynǵa jylyna 2,33 tekshe metrdi quraıdy (qoldanystaǵy normalar - jylyna 2,9 m3). Bul normalardy VIII shaqyrylǵan máslıhattyń kezekten tys XVI sesıasynda máslıhat depýtattary bekitti.
Sondaı-aq, áleýmettik, mádenı, ónerkásiptik, komersıalyq jáne basqa da obektiler úshin komýnaldyq qaldyqtardyń túzilýi men jınaqtalýynyń eseptik normalary ózgertildi (salystyrmaly keste www.almaty.kz saıtynda ornalastyrylǵan).
Almaty qalasy boıynsha komýnaldyq qaldyqtardyń túzilýi men jınaqtalýynyń qoldanystaǵy normalary Almaty qalasy máslıhatynyń 2015 jylǵy naýryzdaǵy sheshimimen bekitilgen bolatyn. Almaty qalasynyń Ekologıa jáne qorshaǵan orta basqarmasy habarlaǵandaı, QR «Qatty turmystyq qaldyqtarǵa arnalǵan polıgondar» qurylys normalaryna sáıkes QTQ jınaqtaý normalaryn naqtylaýdy ár 5 jyl saıyn júrgizý usynylady.
2022-2023 jyldary ózektendirý maqsatynda komýnaldyq qaldyqtardyń túzilýi men jınaqtalýynyń jańa normalaryn ázirleý boıynsha Basqarma jumystar júrgizdi. Zertteýler maýsym saıyn (kóktem, jaz, kúz, qys) júrgizildi, 27,5 myń adamdy qamtıtyn 16 ýchaske (ár aýdannan 2 ýchaskeden) tańdaldy. Zertteý nátıjeleri boıynsha úı ıeleri men basqa obektiler úshin komýnaldyq qaldyqtardyń jınaqtalý normalaryn qaıta qaraý usynyldy.