Qarjy pıramıdalary azamattarǵa aıtarlyqtaı qaýip tóndirip otyr. Osyǵan baılanysty Almaty qalasynyń quqyq qorǵaý organdary olardy áshkerelep, jolyn kesýdi kúsheıtti. 2025 jyldyń 7 aıynyń ishinde 1 000-nan astam adam zardap shekken 10 alaıaqtyq joba toqtatylǵan. Almaty qalasy boıynsha Ekonomıkalyq tergep-tekserý departamenti basshysynyń orynbasary Sabyrǵalı Balǵalıuly Óńirlik komýnıkasıalar qyzmetinde osylaı dedi.
Memleket basshysy aıqyndaǵan «Zań jáne tártip» qaǵıdatyn iske asyrý aıasynda quqyq qorǵaý organdary qarjy pıramıdacyna qarsy belsendi jumys istep jatyr. Almatyda mundaı júıeni anyqtap, ony joıýdy kózdeıtin is-sharalar úzbeı ótkizilip turady.
Internette alaıaqtyqty nasıhattaýǵa qarsy kúresetin mańyzdy quraldyń biri – «Kıberbaqylaý» aqparattyq júıesi. Qazir osy júıeniń kómegimen 846 jarnamalyq silteme buǵattalypty.
Jyl basynan beri Ekonomıkalyq tergep-tekserý departamenti qala boıynsha qarjy pıramıdasyn uıymdastyrǵan osyndaı 10 júıeniń jolyn kesti. Odan 1 000-nan astam azamat zardap shegip, bıyl 6 qylmystyq is sotqa jiberilipti. 2023–2024 jyldary bul kórsetkish 31 is bolǵan eken.
Tergeý is-sharalary aıasynda uıymdastyrýshylardyń bank shotyna, jyljymaly jáne jyljymaıtyn múlkine 7,7 mıllıard teńge kóleminde tyıym salyndy.
Mysaly, «ÚILİ BOLAIYQ» deıtin jalǵan áleýmettik jobanyń jumysy toqtatyldy. Olar ózin qaıyrymdylyqpen aınalysatyn turǵyn úı baǵdarlamasy retinde kórsetip, paıyzsyz bólip tóleý arqyly úı alyp beremiz, salym somasynyń 15–30% mólsherinde tabys tabasyzdar dep aldap, osy júıege adam tartqandarǵa bonýs bermek bolǵan. Biraq aqshanyń bári uıymdastyrýshylardyń jeke shotyna túsip, qordyń esepshotyn múldem qoldanbaǵan. Olar sóıtip 515 salymshydan 50 mıllıon teńgeden astam qarjy jınaǵan. Qazir kúdiktiniń bank shotyna tyıym salynyp, oǵan qatysty elden shyqpaý týraly qolhat túrindegi bultartpaý sharasy qoldanyldy.
Sonymen qatar, qazirgi ýaqytta «Warner Bros», «Roborock» jáne «NFT+TRX» ataýymen taǵy úsh júıege qatysty qylmystyq ister tergelip jatyr. 2024 jyldyń qazanynan 2025 jyldyń qańtaryna deıin uıymdastyrýshylar áleýmettik jelilerdegi targettelgen jarnama arqyly azamattardy osyndaı jobalarǵa tartyp, beınemazmundy kórý arqyly jyldam paıda tabýǵa ýáde bergen. Qatysýshylar krıptovalúta arqyly qosymshalardy satyp alǵannan keıin, olarǵa syıaqylar eseptelip otyrǵandaı kóringen. Alaıda bul burynnan belgili pıramıda júıesi bolyp shyqty. Alǵash kirgenderdiń tabysyn keıingilerdiń salymynyń esebinen tólep otyrǵan. Tergeý barysynda alaıaqtar qoldanǵan krıptovalúta ámıany anyqtalyp, 3,8 mln USDT kóleminde shekteý qoıyldy.
«Tergeý jalǵasyp jatyr, nátıjesin ýaqytyly jarıalap otyramyz. Qarjy pıramıdasyna ár adam óz erkimen jáne zań aıasynan tys kiredi. Sondyqtan salǵan aqshańyzdy qaıtarýǵa eshkim kepildik bermeıdi. Degenmen, keıbir jábirlenýshilerge aqshasyn qaıtaryp bergen. Shyǵyndy óteý týraly sheshimdi tek sot qabyldaıdy», – dep atap ótti Sabyrǵalı Balǵalıuly.
Almaty qalasy boıynsha Ekonomıkalyq tergep-tekserý departamenti azamattardy qyraǵy bolýǵa, jyldam paıda tabýǵa shaqyratyn kúmándi jobalarǵa senbeýge shaqyrdy.
Eger siz nemese sizdiń jaqyndaryńyz osyndaı kúdikti uıymdardyń qarmaǵyna túsip qalyp jatsa, Almatynyń Ekonomıkalyq tergep-tekserý departamentine Jibek Joly dańǵyly, 127 mekenjaıy boıynsha nemese 1458 nómirindegi koll-ortalyqqa jedel túrde habarlasýyńyzdy suraımyz.