Aqtóbe oblysynda Qarjy monıtorıńi agenttiginiń óńirlik departamenti men prokýratýranyń úılestirýimen jalǵan qujattar arqyly júk kólikterin zańsyz tirkep kelgen uıymdasqan qylmystyq toptyń joly kesildi, - dep habarlaıdy Aqshamnews.kz tilshisi.
Tergeý derekterine sáıkes, top músheleri qoldan jasalǵan satyp alý-satý sharttaryn jáne kólik quraldaryn tekserý aktilerin paıdalanyp, "Avtoizdeý" aqparattyq júıesine shyndyqqa janaspaıtyn málimetter engizgen. Sonyń nátıjesinde 77 júk kóligi bastapqy tirkeýden zańsyz ótkizilgen.
Bul áreketter Aqtóbe, Atyraý jáne Batys Qazaqstan oblystarynyń aýmaǵynda salyq zańnamasyndaǵy rásimderdi ádeıi aınalyp ótý maqsatynda júzege asqan. Tirkeý alymdaryn tólemeý arqyly memleketke 740 mıllıon teńgeden astam zalal keltirilgen.
Qazir qylmystyq toptyń uıymdastyrýshylary sot sheshimimen qamaýǵa alyndy. İs boıynsha sotaldy tergep-tekserý jalǵasyp jatyr.
QR Qylmystyq-prosestik kodeksiniń 201-babyna sáıkes, tergeý múddesine baılanysty ózge aqparat ázirge jarıa etilmeıdi.