Prezıdent tapsyrmalaryn oryndau ayasynda otandyq tauar óndírushíler energetıka men tūrǵyn úı-kommunaldyq sharuashylyǵyn jańǵyrtuǵa belsendí túrde tartylyp otyr.
Úkímette ótken baspasóz máslıhatynda Premer-mınıstrdíń orynbasary Qanat Bozymbaev energetıka jáne kommunaldyq sektorlardy jańǵyrtu jóníndegí ūlttyq jobanyń tájírıbelík kezeńí bastalǵanyn habarlady. Memleket basshysy ınfraqūrylym salasyndaǵy bírínshí kezektegí máselelerdí sheshuge basa mán beríp otyr.
Energetıkalyq jáne kommunaldyq sektorlardy jańǵyrtu jóníndegí ūlttyq joba 2024 jylǵy jeltoqsanda bekítíldí. Ūlttyq jobany qūqyqtyq qamtamasyz etu maqsatynda 17 shíldede Memleket basshysy tıístí zańǵa qol qoıyp, ol 29 shíldede kúshíne endí. Aldyn ala esep boıynsha jobany bes jyldan asa merzímde íske asyru úshín 13 trıllıon teńgeden astam ınvestıtsıya tartu qajet. Būl qarajat 86 myń shaqyrym kommunaldyq jelíní qaıta jańǵyrtu men jańadan saluǵa jáne jıyntyq quattylyǵy 7,3 gıgavatt bolatyn generatsıyalau kózderín íske qosuǵa baǵyttalady.
Qarjy tórt negízgí kózden tartylmaq: otandyq jáne halyqaralyq qarjy ınstıtuttary, ekínshí deńgeıdegí bankter, memlekettík byudjet pen Ūlttyq qor qarajaty, sondaı-aq jeke aktsıonerlerdíń – bıznes ıeleríníń qarajaty. Ūlttyq jobanyń pılottyq kezeńíne 35 tabıǵı monopolıya subektísí qatysuda. Qosymsha 22 joba qarastyrylu ústínde. Jyl sońyna deıín 6 ınfraqūrylymdyq kompanıya ınjenerlík jelílerdíń tozu deńgeıín «qyzyl» aımaqtan «ortasha» deńgeıge deıín tómendetíp, 40%-ǵa deıín jetkízuí josparlanǵan.
Pılottyq rejım ayasynda bıylǵy jyly 150 mlrd teńgege juyq ınvestıtsıya tartylyp otyr. Būl qarajat esebínen 8,5 myń shaqyrym ınjenerlík jelíní jóndeu jáne 42 myńnan astam jabdyqty jańartu kózdelgen.
Ūlttyq jobada elíshílík qūndylyqty arttyruǵa da erekshe kóńíl bólíngen. Jalpy somasy 2 trln 140 mlrd teńgení qūraıtyn 2 786 tauar pozıtsıyasy boıynsha otandyq óndírushílerden tūratyn 220 kompanıyadan pul jasaqtaldy. Būdan bólek, óńírlík deńgeıde lıtsenzıya alǵan 669 EPC-merdígerge taldau júrgízíldí. Otandyq óndírushílerdí qoldau ımportqa táueldílíktí azaıtyp, jańa jūmys oryndaryn ashuǵa jáne byudjetke túsetín salyq kólemín arttyruǵa múmkíndík beredí.
Ūlttyq jobany tıímdí júzege asyrudyń mańyzdy qūraly retínde tsıfrlandyru engízílude. Būl úderísterdíń ashyqtyǵyn, jūmystardyń merzímí men sapasyn qadaǵalaudy qamtamasyz etíp qana qoımaı, qatysushylar úshín de qolaıly orta qalyptastyrady. Qazírgí tańda ekí negízgí tsıfrlyq baǵyt júzege asyryluda: «Samūryq-Qazyna» portaly negízínde qūrylǵan Elektrondy satyp alu platformasy jáne «SMART TURMYS» tūrǵyn úı-kommunaldyq sharuashylyq aqparattyq júıesí. Sonymen qatar, arnaıy web-portal men baılanys ortalyǵy ázírleníp jatyr. Būl resurstar arqyly Ūlttyq jobanyń íske asyrylu barysy turaly aqparat barsha azamatqa qoljetímdí bolady.