Talapkerler «Oqý saýattylyǵy» pánin eń jaqsy tapsyrǵan. Bul týraly Almaty qalasynyń Óńirlik komýnıkasıalar qyzmetiniń onlaın brıfıńi barysynda QR Ǵylym jáne joǵary bilim mınıstrliginiń Ulttyq testileý ortalyǵy dırektorynyń orynbasary Naýjan Dıdarbekova málimdedi.
Almatyda 21 myńnan astam adam qańtar aıyndaǵy UBT-ny tapsyrdy. Onyń ishinde talapkerlerdiń 67,2% – y qazaq tilinde, 32,7% - y orys tilinde, 11 adam aǵylshyn tilinde testileýden ótti.
UBT-da shekti baldy 81% jýyq talapker jınady. Ortasha balǵa keletin bolsaq, ol 71 baldy qurady, bul respýblıka boıynsha nátıjeden 2 balǵa joǵary. Eń joǵary bal – 134.
«2024 jylǵy qańtar UBT-synyń qorytyndysy boıynsha talapkerler «Oqý saýattylyǵy» pánin eń jaqsy tapsyrdy. Ortasha eseppen, suraqtardyń 78%-yna durys jaýap berilgen. Al «Fızıkany» tapsyrǵan talapkerler tek 36% tapsyrmany durys oryndaǵan, olar úshin «Salystyrmalylyq teorıasynyń elementteri» taqyryby qıyn boldy. Osylaısha, UBT nátıjeleri boıynsha biz tek sandar emes, sonymen qatar taqyryptar boıynsha egjeı-tegjeı taldaýdy da qoljetimdi», - dep habarlady N.Dıdarbekova.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda qańtar UBT-syna 41 talapker qatysqanyn aıta ketken jón.
UBT ótkizý barysynda 27 ereje buzýshylyq anyqtalǵan. Onyń ishinde 19 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorıadan 8 adam shyǵarylyp, olardyń nátıjeleri joıyldy. Bógde tulǵalar anyqtalǵan joq.
Talapkerler testileý aıaqtalǵannan keıin 30 mınýt ishinde apelásıaǵa bere aldy. Sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Spıker 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziletinin naqtylap aıtty.
«Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady», - dep eskertti N. Dıdarbekova.
Qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti bal jınamaǵandar, shyǵarmashylyq BBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysty.