Almatylyq neırohırýrgter ishteı kóptegen kemistiktermen týǵan nárestege ota jasady
İshteı ókpesi qabynyp, omyrtqa, julyn aqaýlarymen týǵan qyz bala Taldyqorǵandaǵy Oblystyq balalar aýrýhanasynan sanıtarlyq avıasıa arqyly jetkizilgen. Almatydaǵy №2 Balalar qalalyq klınıkalyq aýrýhanasynyń kezekshi dárigerleri náresteni qarap shyqqannan keıin birden jan saqtaý bólimine aýystyrdy. Kompúterlik tomografıa nátıjesinde onyń ishteı omyrtqa kemistigimen týylyp, julynynda úlken jaryq bary anyqtaldy.
Aýrýhana baspasóz qyzmeti taratqan habarlamaǵa súıensek, aıy-kúni jetip týǵan balanyń dúnıege kelgenine 4-aq kún bolǵan. Anasynyń aıtýynsha, náreste bel omyrtqasy men segizkóz tusyndaǵy isik tárizdes óskin saldarynan qatty mazasyzdanady eken.
«Náreste asa aýyr halde boldy. Sebebi ishten bel omyrtqa men segizkóz tusynda mı-julyn jaryǵymen týǵan. Onyń ústine, aıaqtarynyń qozǵalysy shektelgen (tómengi paraparez); aıaq-qolynda qan aınalymy buzylyp, bulshyq etteri seme bastaǵan; jambas qýysyndaǵy buzylys saldarynan dáreti turmaıdy; basynyń kólemi kishkentaı bolyp týylatyn nemese týǵannan keıin óspeı qalatyn mıkrosefalıa aýrýy; eki jaqty polısegmentarly pnevmonıa dıagnozy jaǵdaıdy qıyndata tústi. Segizkóz tusyndaǵy jaryq omyrtqa jolyn jaýyp tastaǵan», - deıdi №2 BQKA dırektory Marat Rabandıarov.
Jetekshi balalar neırohırýrgteri M.Rabandıarov, A.Jarasov, A.Jaılǵanov, D.Sábdenalıev, R.Tansarova, K.Janaıdarov, G.Súleımanova men anestezıolog J.Sholahovtyń qatysýymen konsılıým ótti.
Neırohırýrgıa bólimshesi meńgerýshisi Danıar Sábdenalıevtiń aıtýynsha, balanyń jaǵdaıyn, julyndaǵy jaryqtyń jarylyp, aǵzaǵa ınfeksıa taralý qaýpin eskere otyryp ota jasaý týraly sheshim qabyldandy. Operasıalyq mıkroskoptyń kómegimen julyndaǵy jaryq alyp tastaldy, tóńiregindegi tindermen plasıka jasaldy.
Operasıa mindetti áleýmettik medısınalyq saqtandyrý sheńberinde tegin jasaldy. Esterińizge sala ketsek, Qazaqstanda 18 jasqa deıingi balalar memleket tarapynan saqtandyrylatyn 15 sanatqa jatady.
«Jaqsy nátıjege qol jetkizdik. Julyndaǵy suıyqtyqtyń jaradan syrtqa aǵyp ketý qaýpi seıildi, qazir jara orny jazylyp keledi. Aıaqtardyń qozǵalysy saqtalyp qaldy, ıaǵnı teris dınamıka joq. Pnevmonıa aýrýynan da jazylyp keledi. Taǵy bir qýantatyny, mıyna kompúterlik tomografıa jasaldy, gıdrosefalıa belgileri baıqalmaıdy. Ádette, mundaı ota jasalǵan balalardyń mıyna suıyqtyq jınalady. Jalpy, aldaǵy ýaqytta baqylaýda ustaý kerek. Qazir jasandy tynystaý apparatynan alyndy, bala ózinshe tynys alady. Aldaǵy ýaqytta turǵylyqty jerindegi Oblystyq balalar aýrýhanasyna aýystyrý josparlanyp otyr», - dedi neırohırýrg.
Sábıdiń anasy kishkentaı pasıentke kúrdeli ota jasap, ómirin saqtap qalǵan №2 BQKA dárigerlerine alǵysyn jaýdyrdy.