Almaty qalasy ákimdiginiń jobalyq keńsesi "Jaıly mektep" ulttyq jobasy aıasynda mektep salý baǵyty boıynsha belsendi jumys isteıdi. 2025 jylǵa qaraı qalada 37 100 oqýshyǵa arnalǵan jańa 22 mektep paıda bolady dep josparlanýda, dep habarlaıdy almaty-akshamy.kz
Jaıly mektep – bul balalardyń qýana kelip, bilim alǵysy keletin meken, óıtkeni bul mektepte sapaly bilim alý, damý jáne oqýshylardyń qaýipsizdigin qamtamasyz etý úshin barlyq jaǵdaı jasalynady.
Almaty qalasy ákimdiginiń jobalyq keńsesiniń málimetinshe, jańa formattaǵy mektepterdiń kópshiligi Alataý jáne Naýryzbaı aýdandarynda – árqaısysynda 5 bilim berý mekemesi salynady. Bostandyq aýdanynda – 4, Túrksib aýdanynda – 3, Áýezov aýdanynda – 2, qalǵan aýdandarda bir-birden mektep salý josparlanýda. Mektepter olardyń tapshylyǵy baıqalatyn mekenderde salynýda.
Qazirgi ýaqytta jobalyq-smetalyq qujattardy ázirleý jumystary júrgizilýde. Mektepterdiń qurylysy 2023 jyldyń qarashasynda saraptamadan ótkennen keıin bastalady. Sondaı-aq, aǵymdaǵy kezeńde qala ákimdigi men birqatar aýdandardaǵy jer telimderiniń ıeleri arasynda segiz mektep «tolyq qurylys» júıesi boıynsha salynyp, odan ári paıdalanýǵa berý týraly memorandýmǵa qol qoıý jumystary júrgizilýde.
Ulttyq joba aıasyndaǵy barlyq mektepter biryńǵaı standart boıynsha salynady. Pándik kabınetter men zerthanalardy odan ári jabdyqtaýmen qatar, qurylys barysyna qatań baqylaý ornatylady. Bul rette mektepterge qajetti barlyq materıaldar, qural-jabdyqtar, tipti jıhazdar da qazaqstandyq óndiristen bolmaq.
Jaıly mektepterde erekshe bilim berý qajettilikteri bar balalarǵa da qolaıly jaǵdaı jasalady, joǵary jyldamdyqty ınternet júrgiziledi jáne bastaýysh synyp oqýshylary, joǵary synyp oqýshylary úshin bólek kireberister, sondaı-aq bólek sport zaldary, asqanalar ornatylady
Aýyr rúkzaktar máselesin sheshý úshin mektepterde oqýlyqtardy saqtaýǵa arnalǵan bólek shkaftar ornatylady. Jedelsaty, elektrondy kitaphana jáne hokeı korty da paıda bolady. Ár qabatta paıdaly demalys úshin kovorkıng-aımaqtar jáne aýyz sý burqaqtary ornatylady
Eń bastysy, mektepterde Face ID jáne QR-kodtardy qosa alǵanda, esikterdi avtomatty túrde qulyptaýmen kirý jáne shyǵýdy baqylaý júıesin engizý josparlanýda. Mektep ákimshiligi búkil ǵımarat pen mektep aýmaǵyndaǵy jaǵdaıdy naqty rejımde qadaǵalap otyrýy úshin mindetti túrde beınebaqylaý júrgiziletin bolady
Aıta keteıik, "Jaıly mektep" ulttyq jobasyn Qazaqstan Úkimeti 2022 jyly Prezıdenttiń "Ádil memleket. Birtutas ult. Gúldengen qoǵam" joldaýyn iske asyrý aıasynda qabyldady. Jobanyń basty maqsaty - apatty nysandardy, úsh aýysymdy oqytýdy jáne orta bilim berý uıymdaryndaǵy oqýshy oryndarynyń tapshylyǵyn joıý. Respýblıka boıynsha aldaǵy 2 jylda barlyǵy 401 mektep salý josparlanýda. Ulttyq jobanyń operatory "Samruk-Kazyna Construction"AQ bolyp tabylady.