Investısıanyń jalpy quny 100 mıllıard teńgeden asady
Almatyda Changan, Chery, Haval markaly avtomobılder shyǵaratyn zaýyttyń irgetasy qalandy, dep habarlaıdy Almaty-akshamy.kz Aqordanyń baspasóz qyzmetine silteme jasap.
Memleket basshysy Qasym-jomart Toqaev mýltıbrendti, ıaǵnı Changan, Chery, Haval syndy túrli markaly avtomobılderdi shyǵaratyn zaýyttyń irgetasyn qalaý rásimine qatysty.Prezıdentke jobanyń tólqujaty tanystyrylyp, 2024 jyldyń tórtinshi toqsanynda ashylady dep josparlanǵan zaýyttyń úlgisi kórsetildi. Zaýyttyń óndiris aýmaǵy 100 myń sharshy metrden asady. Úsh avtokólik markasynyń árqaısysy úshin dánekerleý jáne qurastyrý jumystaryna arnalǵan jeke seh salynady.
Zaýyt iske qosylǵannan keıin onyń óndiristik qýaty jylyna 90 myńnan astam kólik shyǵarýǵa jetedi. Investısıanyń jalpy quny 100 mıllıard teńgeden asady. «Astana Motors» kompanıasy 2200-ge jýyq jumys ornyn ashady.