Onyń aıtýynsha, sheshim 5 jeltoqsanda jarıalanady
Bul týraly Ulttyq Bank tóraǵasy Ǵalymjan Pirmatov Qazaqstan qarjygerleriniń X Kongresinde aıtty, dep habarlaıdy Almaty-akshamy.kz inbusiness.kz-ke silteme jasap.
Ulttyq Bank Tóraǵasy Ǵalymjan Pirmatov Bazalyq mólsherleme men qazirgi aqsha-kredıt saıasaty týraly aıtty.
"Qazir komanda bizdiń boljamdarymyzdy qaıta jańartý turǵysynda jumys istep jatyr. Osy boljamdyq raýndtyń qorytyndysy boıynsha derekter men birqatar makroekonomkalyq faktorlarǵa súıene otyryp, sheshim qabyldaımyz. Qajettilik týyndaıtyn bolsa, bazalyq mólsherlemeni taǵy da kóterýge ázirmiz. Ol sheshimdi 5 jeltoqsanda jarıalaımyz. Biz qashan da sheshim qabyldarda negizgi makroekonomıkalyq parametrler boıynsha boljamdardy, ınflásıalyq kútýlerdi jáne basqa da faktorlardy nazarǵa alamyz", - dedi Ulttyq Bank basshysy.
Ol sondaı-aq, bazalyq mólsherleme tóńiregindegi pikirtalas týraly da pikir bildirdi.
"Jalpy, óz basym bazalyq mólsherlemege qatysty pikirtalastyń kásibı ortada bolǵanyn quptaımyn. Bizdiń sheshimderimizdiń túpki mánin naryqtaǵy kásibı qatysýshylardyń kúnnen kúnge túsine bastaǵanyn kórip otyrmyn. Mólsherlemeni tym tómen deńgeıde deıtinder de, kerisinshe, ony tym joǵary kóretinder de bar. Degenmen, kásibı ortadaǵy pikirtalastarǵa qarap, aqparattandyrylýdyń áldeqaıda joǵary ekenin baıqap otyrmyz. Biz buny quptaımyz", - dedi Ǵalymjan Pirmatov.
Ulttyq Bank tóraǵasy sonymen birge, 11 zertteý uıymy qatysatyn kásibı makroekonomıster arasynda turaqty saýalnama júrgizýdi de qolǵa alǵanyn da habarlady.