Týrnırge Qazaqstannyń túkpir-túkpirinen mektep oqýshylary, kolejder men JOO stýdentteri, kásipkerler, sonymen qatar, bilim berý ıdeıalary men jobalarynyń avtorlary qatysty.
TechCup robototehnıka jáne ınovasıalyq tehnologıalar boıynsha eki kúndik chempıonat Almaty Arena muz saraıynyń alańynda ótti, dep habarlaıdy Almaty-akshamy.kz
Chempıonatqa barlyǵy 7-22 jas aralyǵyndaǵy 1300-den astam qatysýshydan turatyn 704 komanda qatysty. TechCup-2022 júlde qory 4,6 mln teńge.
Ákim kýbogy men 1 mln teńgeni, ıaǵnı bas júldeni Almaty qalasy Nazarbaev Zıatkerlik mektebi hımıa-bıologıalyq bólimshesiniń komandasy ıelendi.
I dárejeli dıplomdy 24 komanda; II dárejeli dıplomdy - 37 komanda; III dárejeli dıplomdy - 61 komanda aldy.
Buǵan qosa, chempıonatqa qatysýshylarǵa respýblıkanyń úzdik joǵary oqý oryndarynan 4 jyl ishinde oqýǵa 18 grant bólindi. Atap aıtqanda, Qazaqstan-Brıtan tehnıkalyq ýnıversıtetinde oqýǵa 5 grant; Halyqaralyq ınjenerlik-tehnologıalyq ýnıversıtetke 5 grant; Halyqaralyq aqparattyq tehnologıalar ýnıversıtetine 5 grant; Q.I. Sátbaev atyndaǵy Qazaq ulttyq zertteý ýnıversıtetine 3 grant bólindi. 18 granttyń 10-yn Almaty qalasy mektepteriniń túlekteri enshiledi.
Chempıonatty Almaty qalasynyń bilim basqarmasy uıymdastyrdy.