Almaty qalasy boıynsha Sybaılas jemqorlyqqa qarsy qyzmet «Zań jáne tártip» bastamasy aıasynda Almaty qalasy boıynsha Qylmystyq-atqarý júıesi departamentiniń (QAJD) №13 mekemesinde semınar-keńes ótkizdi. Bul týraly Aqshamnews.kz saıty habarlaıdy. Jıynnyń basty maqsaty – qylmystyq-atqarý júıesindegi sybaılas jemqorlyqtyń aldyn alý jáne onyń táýekelderin azaıtý boldy.
Semınarǵa túzeý mekemesiniń qyzmetkerleri, qadaǵalaý qyzmetiniń ókilderi jáne 200-den astam sottalǵan azamat qatysty. İs-shara barysynda qylmystyq-atqarý júıesindegi ashyqtyqty qamtamasyz etý, zań talaptarynyń saqtalýyn kúsheıtý jáne sottalǵandardy qaıta tárbıeleý sharalarynyń tıimdiligi talqylandy.
Almaty qalasy boıynsha Sybaılas jemqorlyqqa qarsy qyzmettiń aldyn alý basqarmasynyń basshysy Qanat Salımbaev negizgi baıandama jasap, quqyqtyq memlekettiń damýynda zańdylyq pen ashyqtyqtyń mańyzdylyǵyn atap ótti. Ol qyzmetkerler men sottalǵandardyń sybaılas jemqorlyq táýekelderinen aýlaq bolýy qajettigin, bul úshin qoǵamdyq jáne ishki baqylaý tetikterin kúsheıtý kerektigin aıtty.
Kezdesý barysynda qylmystyq-atqarý júıesi qyzmetkerleriniń ádep qaǵıdalaryn saqtaýyna jáne qyzmettik mindetterin adal oryndaýyna erekshe kóńil bólindi. Sondaı-aq, sottalǵandardyń quqyǵyn qorǵaý máselesi kóterilip, olar ózderiniń qamaýda ustalýy zań talaptaryna sáıkes ekenin jáne túzeý mekemesi qyzmetkerleriniń is-áreketine shaǵymdary joq ekenin jetkizdi. Sonymen qatar, keıbir sottalǵandar jazany jeńildetý máselesinde sot sheshimderiniń ártúrliligine alańdaýshylyq bildirdi.
Qanat Salımbaev sottalǵandarǵa sybaılas jemqorlyq jaǵdaılarymen betpe-bet kelgen kezde qandaı áreket jasaý kerektigin túsindirip, Sybaılas jemqorlyqqa qarsy qyzmetke júginý joldaryn baıandady. Sondaı-aq, aldyn alý sharalary aıasynda sottalǵandarǵa qylmystyń saldary men onyń aldyn alý taqyrybynda áleýmettik beınerolıkter daıyndaýǵa qatysý usynyldy.
Bul is-shara quqyqtyq tártipti nyǵaıtýǵa jáne halyqtyń memlekettik organdarǵa degen senimin arttyrýǵa baǵyttalǵan memlekettik saıasattyń mańyzdy bóligi bolyp tabylady.