Almatyda polısıanyń servıstik ortalyqtary qalaı jumys isteıtini talqylandy, dep habarlaıdy Almaty-akshamy.kz.
Polısıa jumysynyń servıstik modelin engizý sheńberinde Memleket basshysy Almaty qalasynyń segiz aýdanynda servıstik ortalyqtar ashýdy tapsyrǵan bolatyn. Mundaı qadam polısıa bólimshelerine túsetin aýyrtpalyqty azaıtýǵa jáne olardyń jumys tıimdiligin arttyrýǵa múmkindik beredi. Qazir megapolıstiń turǵyndary men qonaqtary ártúrli máseleler boıynsha aýdandyq polısıa bólimderiniń janyndaǵy front-ofısterge júginedi.
Bul kelýshiler úshin de, qyzmetkerler úshin de yńǵaısyz. Sebebi munda beıbit turǵyndardan bólek, qylmys jasady dep tanylǵan kúdiktiler jetkizilip, probasıa esebinde turǵan sottalǵandar da keledi. Eńbek mıgranttarynyń da qarasy qalyń. Sonymen qatar polısıa ǵımarattary rejımdik nysan bolǵandyqtan azamattar tolyq tekserýden ótýge májbúr, uıaly telefondary ýaqytsha alynyp, qyzmetker birge erip-júrýi mindetti. Prezıdenttiń servıstik ortalyqtar qurý jónindegi tapsyrmasyn oryndaý maqsatynda İİM jáne Almaty qalasy ákimdigi ókilderiniń qatysýymen jumys kezdesýi ótti.
"Atalmysh jobanyń tujyrymy – "klıentke" baǵdarlaný. Búginde İİM baǵalaý ındıkatorlaryn ózgertip jatyr. Sondyqtan da qajetti jańa tásilder azamattarymyzdyń kóńilinen shyǵýy tıis", – dedi mınıstr Marat Ahmetjanov.
Ekinshi deńgeı – ýchaskelik polısıa pýnktteri. Qazirgi ýaqytta el boıynsha 2700-den astam pýnkt jumys isteıdi. Jańa formattaǵy úsh nysan Astana, Pavlodar jáne Aqtóbe qalalarynda ornalasqan. Olardyń negizgi "klıentteri" shaǵynaýdandardyń turǵyndary bolyp tabylady.
Úshinshi deńgeı – ótinish berýshiler men qyzmet alýshylarǵa arnalǵan polısıanyń servıstik ortalyqtary. Servıstik ortalyqtarda tegin 55 túrli qyzmet kórsetiletin bolady. Polısıa tarapynan kóshi-qon, ákimshilik zańnama jáne quqyq buzýshylyqtyń aldyn alý salasyndaǵy mamandar ornalastyrylady.
Budan basqa onda medıator, zań qyzmetterin kórsetý jónindegi konsýltant jáne psıholog jumys isteıtin bolady. Áıelderdiń quqyqtaryn qorǵaý jónindegi qyzmetter usynylyp, İİM joǵary oqý oryndaryna oqýǵa jáne İİO-ǵa jumysqa qabyldaý boıynsha keńester beriledi. Servıstik ortalyqtardyń negizgi maqsaty – qoǵammen ashyq dıalog quryp, halyqtyń suranysyna jedel den qoıý, qala turǵyndary men qonaqtaryna kásibı, bilikti kómek kórsetý.