Revaksınasıa - eki vaksınadan soń bizdiń aǵzamyzdy koronavırýsqa qarsy ary qaraı ımýnıtetti qalyptastyrý úshin salynady
Bul týraly №14 qalalyq emhananyń jalpy praktıka bólimshesiniń meńgerýshisi Roza Bekbaeva onlaın-suhbat barysynda aıtty, dep habarlaıdy Almaty-akshamy.kz Soronavirus2020.kz-ke silteme jasap
Dáriger aldymen vaksınalaýǵa kimderdiń qarsy kórsetilimi bar ekenin aıtty.
«Vaksınalaý aýyr onkologıalyq aýrýmen aýyratyn jáne dári-dármekterge aýyr alergıalyq reaksıasy bar adamdarǵa qarsy kórsetilgen. Biz vaksına salmas buryn osynyń bárin eskeremiz. Iaǵnı, eń aldymen mindetti tekserý, analız jınaý, saýalnama júrgizgen soń ǵana vaksına salamyz. Aıta keteıin, aýyr alergıalyq reaksıa vaksınalaýdyń negizgi qarsy kórsetilimi bolyp tabylady», - dedi emhana meńgerýshisi.
Onyń aıtýynsha, qazirgi tańda emhanada Pfizer vaksınasyn saldyrǵysy keletinder óte kóp.
«Eger Pfizer vaksınasynyń alǵashqy partıasy bitse, taǵy jetkizilimi bolady dep oılaımyn. Sebebi, qazirgi ýaqytta bul vaksınaǵa suranys joǵary. Tipti, qart adamdar kelip Pfizer vaksınasy jaıly surap jatady», - dedi dáriger.
Dáriger jasóspirimderdi vaksınalaýdyń mańyzdylyǵy men egilýden keıingi qalypty jaǵdaılardy eske saldy.
«Jasy 12-den joǵary balalar aýrýdy tasymaldaýshy bolýy múmkin. Sebebi, 12-18 jas aralǵyndaǵy jasóspirimder adamdar kóp jınalatyn oryndarǵa, mektepterge, túrli úıirmelerge barady. Sondyqtan ózderi aýyrmas úshin jáne aınalasyndaǵylar da juqtyrmas úshin olardy vaksınalaý durys». «Egilýden keıingi qalypty jaǵdaı bolyp, dene qyzýynyń kóterilýi, azdaǵan diril, múmkin búkil deneniń aýrýy bolyp tabylady. Biraq, bul belgiler ádette úsh kúnnen aspaıdy. Bizdiń emhanada men ózim baıqaǵandaı, vaksına alǵan adamdarda bul belgiler eki kúnnen artyq sozylǵan joq jáne aýyr asqynýlar bolǵan joq», - dedi Roza Bekbaeva.
Sondaı-aq, onyń aıtýynsha, qazirgi ýaqytta emhanaǵa júkti áıelder de Pfizer vaksınasyn saldyrýǵa kelip jatyr.
«Júkti áıelder vaksınany 16 apta men 37 apta aralyǵynda saldyrady. Biz olardy qadaǵalaımyz. Aldymen vaksına saldyrmas buryn olardyń analızin jınaıdy, vaksına saldyrǵan soń, jarty saǵat emhanada bolady. Kelesi úsh kún boıy biz olarmen tyǵyz baılanysta bolamyz», - dedi dáriger.
Roza Bekbaevanyń aıtýynsha, qazirgi tańda №14 qalalyq emhanasyna 34 800 adam tirkelgen. Onyń 15 000-i balalar, 1-shi jáne 2-shi vaksına alǵandar sany 15 283. 6 aı ótken soń, úshinshi vaksınany – 1022 adam alǵan.