Qazaqstandyq fılm álemdik kınofestıvalderde 50-ge jýyq júldege ıe bolyp úlgergen
«Qazaqfılm» kınostýdıasy alǵashqy ataýy «Prıchal» bolǵan «Podsolnýh» fılminiń túsirilimin 2019 jyly aıaqtady, alaıda pandemıa saldarynan búginge deıin tusaýy kesilmegen kartına túrli festıválderge usynylǵan. Elı Gılmannyń dramasy 27 halyqaralyq kınofestıvalde túrli nomınasıalar boıynsha 47 júlde jınady. Kınokartına QR Mádenıet jáne sport mınıstrliginiń tapsyrysy boıynsha túsirilgen.
«Podsolnýh» - ata-ana arasyndaǵy túsinispeýshilik saldarynan kúızeliske ushyraǵan otbasy ómirinen syr shertetin dramaǵa toly shyǵarma. Áke-sheshesi óz suraqtaryna jaýap izdep júrgende qaraýsyz qalǵan bala úıde de, túzde (mektepte) de ornyn tappaı, kemsitý men qorlyqtyń bar azabyn tartady. Qaýipsiz meken izdegen Ámir kompúter oıyndarynyń áserli álemine enip, óziniń qalaı oıynqumarǵa aınalǵanyn baıqamaıdy.
Rejıserdiń aıtýynsha, «Kúnbaǵystyń» negizgi ıdeıasy – adamdar arasyndaǵy qarapaıym qarym-qatynastyń mańyzdylyǵy, onyń búgingi kúni jetispeýshilgi. Áleýmettik qysym, jalǵyzdyq, belgisizdikten qashý taqyryptary barlyq mádenı landshafttarda qıylysady. Munyń ózi fılm ıdeıalaryn adamdar úshin ózekti etedi. Bizdiń kópshiligimizge janashyrlyq, túsinistik, meıirimi jetispeı jatady, sondyqtan bul ıdeıalar ulttyq deńgeıden asyp, adamzattyń máselelerin kóteredi.
«Bul problema barlyq otbasylarǵa tán der edim. Meniń ózim ana retinde osyndaı synaqtan ótip, ishteı tynǵan balama sózimdi jetkize almaǵan shaqtardy bastan keshirmesem, bul kartına týmas ta edi... Olar búgin kórsetilimge kelý kerek edi. Ókinishke oraı, kelmedi. Biz fılm tıtrlarynda balanyń atyn jazbadyq, biraq basty keıipker – ómirden ótken jetkenshektiń prototıpi. Tipti, bas akterdi tańdaǵanda da sol balanyń kelbetine uqsas adamdy izdedim. Kartınany atalǵan otbasyǵa arnaımyn», - dedi rejıser Elı Gılman.
Senarıin Rasýl Shybyntaı jazǵan fılmdegi basty róldi jas akter Rashıd Mýsın oınasa, onyń anasyn Serbıadan kelgen aktrısa Sloboda Mıchalovıch somdady. Odan bólek, túsirilimge tanymal akter Kırıll Káro qatysty.
«Oqýshylar arasyndaı mundaı oqıǵalar jıi oryn alady. Dostarymyzdyń arasynda osy máseleni únemi kóteremiz. Sebebi, bul tek balaǵa ǵana emes, ata-anaǵa, tipti, bar qoǵamǵa qatysy bar problema. Fılmdegi keıbir kadrlardyń Nazarbaev mektebinde túsirilýi de bir sımvolıkalyq máni bar kezdeısoqtyq sıaqty», - dedi Rashıd.
«Podsolnýh» fılmi kelesi jyldyń sáýir aıynda long-prokat túrinde júretinin eskertemiz. Iaǵnı, long – degenimiz uzaq merzimdi kórsetilim bolatynyn bildiredi. Ara-tura kınoteatrlardyń afıshasyna ilinip, kórsetilip turady. Qalaǵan ýaqytyńyzda baryp, tamashalaı alasyz.