Bıyl Aqsaı, Úlken jáne Kishi Almaty ózenderiniń baseınderindegi 7 kóldi bosatý jumystary júrgiziledi.
Bul týraly qalalyq Tótenshe jaǵdaılar departamentiniń baspasóz qyzmeti málim etti, dep habarlaıdy Almaty-akshamy.kz QazAqparatqa silteme jasap.
«Almaty mańynda 45 morenalyq jáne muzdyq kól ornalasqan, olardyń ishinde asa qaýiptisi – 12. Almaty qalasynyń aýmaǵynda selmen kúresýdiń eń tıimdi ádisi - morenalyq kólderdi bosatý boıynsha aldyn alý jumystaryn júrgizý. Bıyl Aqsaı, Úlken jáne Kishi Almaty ózenderiniń baseınderindegi 7 kóldi bosatý jumystary aýa raıynyń qolaısyzdyǵyna jáne taýly aımaqtyń tómen temperatýralyq jaǵdaıyna baılanysty bir aı keshirek bastaldy»,-dep habarlady vedomstvodan.
Aldyn alý jumystaryna barlyǵy 40 adam kirisip, búldozerler iske qosyldy, evakýasıalyq kanaldardy tazartý jáne tereńdetý jumystaryn júrgizý josparda bar.
«Sýdy qosymsha aıdaý úshin arnaıy pontondarda 10 birlik ónimdiligi joǵary sý sorý qondyrǵylary daıyndaldy. Sondaı-aq, sý aǵyzý belgilengen sıfondy qubyrlar jelileri boıynsha júzege asyrylady. №6 jáne 13 Bıs kólderindegi eki sıfon jelisi avtomatty túrde qosyldy. Úlken Almaty ózeni baseınindegi №8 jáne 13 Bıs qaýipi bar kólderde qosymsha 2 jelini qosý josparlanýda, ol úshin 2900 metr polıetılen qubyrlary daıyndaldy»,- dep atap ótti qalalyq TJD baspasóz qyzmetinen.
Morenalyq kólderdiń jaı-kúıine baqylaý júrgizý úshin turaqty negizde jumys isteıtin 9 beketke qosymsha 10 bıik taýly maýsymdyq beketter qoıylǵan. Sel qaýpi bar kezeńde barlyǵy 19 beket jumys isteıtin bolady. Sondaı-aq Tótenshe jaǵdaılar departamenti sel qaýpin avtomattandyrylǵan monıtorıń arqyly baqylaıdy.