QR Prezıdenti janyndaǵy Ortalyq komýnıkasıalar qyzmetinde ótken Qorǵanys mınıstrliginiń brıfıńi aldaǵy «Aıbyn-2024» X halyqaralyq áskerı-patrıottyq jastar jıynyna arnaldy.
Jarysty uıymdastyrý erekshelikteri men «Jas sarbaz» balalar-jasóspirimder qozǵalysy jumysynyń nátıjeleri týraly BAQ ókilderine Tárbıe jáne ıdeologıalyq jumys departamentiniń bastyǵy ádilet polkovnıgi Tileýhan Basqojaev aıtyp berdi, dep habarlaıdy Almaty-akshamy.kz Qorǵanys mınıstrliginiń saıtyna silteme jasap.
Ol bıylǵy jıyn Keńes Odaǵynyń Batyry, Halyq qaharmany, táýelsiz Qazaqstannyń tuńǵysh Qorǵanys mınıstri armıa generaly Saǵadat Nurmaǵambetovtiń 100 jyldyǵyna arnalyp otyrǵanyn jetkizdi.
– Ázerbaıjan, Belarýs, Qazaqstan, Qyrǵyzstan, Reseı jáne Ózbekstan komandalary qatysatyn jıyn Qurlyq áskerleri áskerı ınstıtýtynyń «Álı» oqý ortalyǵy men joǵary oqý ornynyń aýmaǵynda ótedi, – dedi ol.
Jıynnyń bıylǵy baǵdarlamasynda «Jas sarbaz hab» kovorkıng-ortalyǵynyń jumysyn bastaý jáne «Mindet», «Abyroı», «Erlik» taqyryptyq sektorlarynan turatyn «Saǵadat» mobıldi ınteraktıvti-aqparattyq modýlin iske qosý kózdelip otyr.
– Dalalyq jaǵdaıda aty ańyzǵa aınalǵan batyr Saǵadat Nurmaǵambetovke arnalǵan «Halyq júregindegi qaharman» murajaı ekspozısıasy ashylady. Budan bólek «Birtutas ult – birtutas ásker» kezdesýinde jasóspirimder Qazaqstannyń áskerı oqý oryndarynda qandaı mamandyqtarǵa bilim alýǵa bolatyny jáne oqýǵa túsý sharttary týraly aqparat alady, – dep jalǵastyrdy ol.
Sondaı-aq komandalar óz eliniń mádenıetin, turmysy men ulttyq dástúlerin kórsete alatyn «Birlik ordasy» ınteraktıvti-aqparattyq ekspozısıasy ornalastyrylady.
Etnoaýyl alańynda asyq atý, bestas, toǵyzqumalaq jáne basqa da ulttyq sport túrleri boıynsha jarystar ótkizilmek. Sonymen birge altybaqan men sadaq atýǵa arnalǵan arnaıy jer bólinedi.
Polkovnık T. Basqojaev jarys baǵdarlamasymen de tanystyrdy. Oǵan kedergiler jolaǵymen áskerılendirilgen estafeta, «Aıbyn daryny» zıatkerlik oıyny jáne týǵan jer, Uly Otan soǵysynyń batyrlary men Saǵadat Nurmaǵambetovke arnalǵan ánder shyrqalatyn «Aıbyn juldyzy» vokaldyq baıqaýy kiredi.
Jıynnyń absolútti jeńimpazy «Kúshimiz birlikte» dalalyq-taktıkalyq oıynynyń nátıjesi arqyly aıqyndalady. Munda baǵdar boıynsha júrý jáne jol boıyndaǵy tapsyrmalardy oryndaý qarastyrylǵan. Oıynǵa qatysýshylar jer bederin baǵdarlaý, granata, pyshaq laqtyrý, túrli qarýdan atý, zardap shegýshige dárigerge deıingi kómek kórsetý daǵdylaryn kórsetedi. Sondaı-aq baıqaýǵa qatysýshylardyń qarsylas avıasıasynyń shabýyly kezindegi jáne zalaldanǵan jer ýchaskesin júrip ótýi sekildi tótenshe jaǵdaıda áreket etý qabileti tekseriledi.
Brıfıń sońynda ádilet polkovnıgi Tileýhan Basqojaev bıyl «Aıbyn» jastar jıynynda 280 myńnan astam balalar men jasóspirimderdi biriktiretin, tarıhy 2015 jyldan bastaý alatyn «Jas sarbaz» respýblıkalyq balalar-jasóspirimder qozǵalysy jumysynyń onjyldyq qorytyndysy shyǵarylatynyn aıtty. Munda balalar úshin «Jas sarbaz» synyptarynda, Smart Sarbaz úıirmelerinde jáne sany 8 myńǵa jetken áskerı-patrıottyq klýbtarda oqýǵa múmkindik jasalǵan.
Osyǵan deıingi jıynǵa qatysýshylardyń 30%-y, ıaǵnı úsh myńnan asa jas «Jas ulan» respýblıkalyq áskerı mektepterine, áskerı kolejderge, elimizdiń jáne sheteldiń joǵary áskerı oqý oryndaryna túsken bolatyn. Muny qozǵalysty uıymdastyrýshylar jumysynyń nátıjesi deýge bolady. Osylaısha, jastardyń áskerı-qoldanbaly sport túrleri men robototehnıkaǵa degen qushtarlyǵy olardy Otan qorǵaýshylar qataryna qosty.