«Ortalyq Azıa jáne BUU bitimgerligi: aǵymdaǵy qyzmet jáne perspektıvalar».
Osy taqyrypta Qorǵanys mınıstrligi Bitimgerlik operasıalar ortalyǵynda óńirlik dóńgelek ústel ótti, dep habarlaıdy Almaty-akshamy.kz.
Qorǵanys mınıstrliginiń málimetinshe, BUU-nyń halyqaralyq bitimgerler kúnine oraılastyrylǵan is-shara Qazaqstan men Tájikstan qorǵanys vedomstvolarynyń, Birikken Ulttar uıymynyń, «BUU-áıelder» qurylymy keńsesiniń, Halyqaralyq Qyzyl Kres komıtetiniń jáne otandyq joǵary oqý oryndarynyń ókilderin jınady.
Otyrysqa qatysýshylar Ortalyq Azıa elderiniń beıbitshilikti nyǵaıtý isine qosqan úlesin atap ótti, sondaı-aq halyqaralyq gýmanıtarlyq quqyq jáne bitimgerliktiń genderlik aspektileri máselelerin talqylady.
Qorǵanys mınıstrligi Bitimgerlik operasıalar ortalyǵynyń bastyǵy polkovnık Baýyrjan Nyǵmetýllın bitimgerlik kontıngentin óz betinshe óristetý, áskerı qyzmetshilerdi bitimgerlik jáne tildik daıyndaý tájirıbesin Ortalyq Azıa elderindegi áriptesterimen bólisýge daıyn ekenin jetkizdi.
– Biz Ortalyq Azıa elderiniń bitimgerlik áleýetin kúsheıtý aıasynda BUU mısıalary úshin sarapshylardy daıyndaýda jáne birlesken bastamalardy iske asyrýda kúsh-jigerimizdi biriktire alamyz, – dep atap ótti ol.
Birikken Ulttar Uıymynyń Nú-Iorktegi bas keńsesiniń Bitimgerlik operasıalar departamentiniń ókili Gerbert Loret Qazaqstannyń bitimgerlik operasıalarǵa qatysý úshin óz kontıngentterin jiberetin eldermen ózara is-qımyl jasaýdaǵy qyzmetin oń baǵalady. Ol is-shara Ortalyq Azıa óńirinde bilim men tájirıbe almasý, daıyndyq turǵysynan seriktestik qarym-qatynas ornatýǵa yqpal etetinine senim bildirdi.
Búginde Bitimgerlik operasıalar ortalyǵy óńirdegi biregeı alań bola otyryp, áskerı qyzmetshilerdi BUU mısıalaryna qatysýǵa oqytý men daıyndaýdaǵy tásilderdi jetildirý men túrlendirý boıynsha únemi jumys istep keledi.
Ortalyq bazasynda ártúrli elderdiń tyńdaýshylarynyń qatysýymen Birikken Ulttar Uıymy sertıfıkattaǵan kýrstar ótkizilip turady. Ýnıversıtettermen tyǵyz yntymaqtastyqta halyqaralyq gýmanıtarlyq quqyqty zerdeleý uıymdastyrylyp, stýdentterge bitimgerlik taqyryby boıynsha kýrstar ótkiziledi.
Aıta ketý kerek, Qazaqstan BUU-nyń bitimgerlik operasıalaryna qatysý kókjıegin únemi keńeıtip keledi. Elimiz áskerı qyzmetshilerdi Nepaldaǵy, Kot-d ' Ivýardaǵy jáne Malıdegi BUU mısıalaryna jiberdi. Qazirgi ýaqytta bizdiń bitimgerler Lıvanda, Batys Saharada, Ortalyq Afrıka Respýblıkasynda jáne Kongo Demokratıalyq Respýblıkasyndaǵy mısıalarda qyzmet etedi.
Sondaı-aq, BUU-nyń Golan jotalaryndaǵy mısıasyna alǵashqy táýelsiz bitimgerlik kontıngent ornalastyryldy. Bul tarıhı qadam elimizdiń yntymaqtastyqqa, beıbitshilik pen jahandyq qaýipsizdikti saqtaýǵa degen umtylysyn kórsetti.