Almaty qalasynyń Tótenshe jaǵdaılar departamenti Órt qaýipsizdigin oqytýdyń ınovasıalyq tásilderin belsendi túrde engizip, profılaktıkalyq jumysty barlyq jas toptary úshin qyzyqty ári qoljetimdi etip jasaýda, dep habarlaıdy aqshamnews.kz.
Balalar men jastarǵa erekshe kóńil bólinedi, dep habarlady Óńirlik komýnıkasıalar qyzmetiniń brıfıńinde Almaty TJD Memlekettik órt baqylaý basqarmasynyń bastyǵy Konstantın Kanın.
Mysaly, TJD bastamasy boıynsha turǵyn aýdandarda órtke qarsy taqyryptaǵy beınerolıkterdiń keshki kórsetilimderi uıymdastyrylyp, saýda ortalyqtarynda órt qaýipsizdiginiń biryńǵaı saǵattary ótkiziledi, Instagram jáne TikTok áleýmettik jelilerinde jastardyń nazaryn aýdaratyn taqyryptyq beınerolıkter taratylady.
Sonymen qatar, 59 jekemenshik balabaqshada jáne «Mart Village» saýda ortalyǵynda órt qaýipti oıyndardyń zardaptaryn túsindiretin qýyrshaq spektáklderi men múltfılm kórsetilimderi uıymdastyryldy.
Oqý prosesin qyzyqty ári oıynǵa aınaldyrý úshin balabaqshalarǵa órt qaýipsizdigi taqyrybyna arnalǵan 143 pazldar jınaǵy berildi.
Sonymen qatar, erekshe qajettilikteri bar balalar úshin «Meıirim» ońaltý ortalyǵynda arnaıy sabaqtar ótkizildi.
Profılaktıkalyq beınerolıkter kınoteatrlarda kınoseanstar aldynda qosylyp turady, al jylytý maýsymynyń basynan bastap turǵyndardyń uıaly telefondaryna jylý júıelerin qaýipsiz paıdalaný boıynsha usynystarmen 9 SMS-habarlama jiberildi. Ár habarlama 3 mıllıonnan astam abonentti qamtydy.
Qaýipsizdikti qamtamasyz etý úshin TJD-dan negizgi usynystar:
- Balalardy órt qaýipsizdigi mádenıetine erte jastan baýlyp, ottyń qaýiptiligin túsindirý;
- Balalardy eshqashan qaraýsyz qaldyrmaý;
- Balalarǵa órt kezindegi tártip erejelerin túsindirý;
- Úıdegi elektr symdarynyń jaǵdaıyn únemi tekserip otyryńyz, óıtkeni órtterdiń kópshiligi elektr jelileriniń durys jumys istemeýine baılanysty.
- Zaqymdalǵan elektr qurylǵylaryn paıdalanbańyz, sebebi bul órtke ákelýi múmkin;
- Rozetkalardyń jaramdylyǵyn baqylaý jáne kóptegen qurylǵylardy bir kózge qosýdan aýlaq bolý;
- Tek sertıfıkattalǵan uzartqysh symdar men zaýytta jasalǵan jelilik súzgilerdi qoldanyńyz;
- Tósekte temeki shegýden aýlaq bolyńyz:
- Jylytý qazandyqtaryna ýaqtyly qyzmet kórsetińiz, sonyń ishinde murjalardy únemi tekserip, ystan tazalaý.