«QazaqGaz Aimaq» AQ Almaty qalasyndaǵy gaz jelilerin jańǵyrtý boıynsha 2025 jylǵa arnalǵan josparlaryn jarıalady.
«QazaqGaz Aimaq» AQ Almaty óndiristik fılıalynyń óndiristik-tehnıkalyq bóliminiń bastyǵy Aıbek Qasymov Óńirlik komýnıkasıalar qyzmeti brıfıńinde habarlaǵandaı, bıyl jelilerdi qaıta qurý boıynsha aýqymdy jumystar júrgiziletin bolady, dep habarlaıdy aqshamnews.kz.
Spıkerdiń aıtýynsha, megapolıste gazben jabdyqtaý júıesin qaıta qurýǵa baǵyttalǵan ınvestısıalyq baǵdarlama bekitilgen.
Baǵdarlama aıasynda 2024 jyly qalanyń mańyzdy aýdandarynda – Alataý, Naýryzbaı, Túrksib, Áýezov, Almaly jáne Jetisý aýdandarynda 2 2 shaqyrym gaz qubyry qaıta jańǵyrtyldy. Bul jumystar ınfraqurylymnyń qyzmet etý merzimin uzartýǵa jáne júıeniń ótkizý qabiletin arttyrýǵa múmkindik beredi.
Aıbek Qasymovtyń aıtýynsha, 2025 jyly jańǵyrtý jumystary jalǵasady. Josparǵa sáıkes:
- orta jáne tómen qysymdy 31,7 shaqyrym gaz qubyryn qaıta qurý;
- 11 shkafty gaz retteý pýnktin (SHGRP) jańartý;
- 13 elektrohımıalyq qorǵanys nysanyn jańǵyrtý jumystary josparlanǵan.
Bul sharalar gazben jabdyqtaý senimdiligin arttyrýǵa, paıdalaný táýekelderin azaıtýǵa baǵyttalǵan jáne qoldanystaǵy jelilerdiń qyzmet etý merzimin uzartýǵa múmkindik beredi.
«Bizdiń mindetimiz - maýsymǵa qaramastan Almatynyń árbir turǵyny úshin úzdiksiz jáne qaýipsiz gazben jabdyqtaýdy qamtamasyz etý. Qaıta qurý jumystarynyń arqasynda biz gaz qubyrlarynyń ótkizý qabiletin arttyryp, qalanyń ósip kele jatqan suranysyn qanaǵattandyramyz», – dedi kompanıa ókili.
Sonymen qatar, turǵyndar arasynda qaýipsizdik deńgeıin arttyrý boıynsha belsendi jumys jalǵasýda. Baǵdarlama sheńberinde kompanıa qyzmetkerleri turǵyndardy turaqty túrde gazdy paıdalaný erejeleri jaıly aqparattandyryp, jadynamalar taratady. Metro ekrandarynda beınerolıkter kórsetilip, «112» qyzmeti arqyly qala turǵyndarynyń telefondaryna qaýipsizdik sharalary týraly SMS-habarlamalar jiberiledi.