Almaty qalasynda Oqýshylardyń ınovasıalyq shyǵarmashylyq ortalyǵy qurylýy múmkin.
Bul týraly «Ashyq» NQA portalynda jarıalanǵan shahar basshysy Erbolat Dosaevtyń tıisti qaýlysynda jazylǵan, dep habarlaıdy Almaty-akshamy.kz QazAqparatqa silteme jasap.
«QR jergilikti memlekettik basqarý jáne ózin-ózi basqarý týraly», «Bilim týraly» jáne «Memlekettik múlik týraly» QR zańdaryna sáıkes, Almaty qalasynyń ákimdigi qaýly etedi: Almaty qalasy bilim basqarmasynyń «Oqýshylardyń ınovasıalyq shyǵarmashylyq ortalyǵy» komýnaldyq memlekettik qazynalyq kásiporny qurylsyn. Kásiporynnyń qyzmeti óz tabysy jáne QR búdjet zańnamasynda aıqyndalǵan tártippen alynǵan búdjet qarajaty esebinen damý josparyna sáıkes qarjylandyrylady», - delingen qujatta.
Shyǵarmashylyq ortalyǵynyń qyzmet baǵyttary:
- ulttyq jáne jalpyadamzattyq qundylyqtar, ǵylym men tehnıka jetistikteri negizinde jeke tulǵany qalyptastyrýǵa, jan-jaqty damytýǵa jáne kásibı shyńdaýǵa baǵyttalǵan halyqaralyq jáne qazaqstandyq standarttarǵa sáıkes keletin joǵary sapaly qosymsha bilim alý úshin qolaıly jaǵdaılar jasaý jáne zamanaýı talaptardy qamtamasyz etý;
- jeke tulǵanyń shyǵarmashylyq, rýhanı, dene múmkindikterin damytý, olardyń qabiletterin iske asyrý, darynyn anyqtaý jáne jetildirý;
- izdenimpazdyq pen shyǵarmashylyq oılaýdy qalyptastyrý;
- ınovasıalyq ıdeıalar men ázirlemelerdiń generasıasyn yntalandyrý;
- ómirdiń ártúrli salalaryndaǵy balalar bastamalaryn qoldaý;
- jańa tehnologıalar salasyndaǵy zertteýlerge qyzyǵýshylyqty arttyrý;
- balalar men jastardyń ınovasıalyq shyǵarmashylyǵyn qoldaý, onyń ishinde kásibı daıyndyq deńgeıin arttyrý, olardy kásiptik bilim berý uıymdaryna oqýǵa túsýge daıyndaý;
- adamgershilik pen salaýatty ómir saltynyń berik negizderin qalyptastyrý, daralyqty damytý úshin jaǵdaı jasaý arqyly zıatkerlikti baıytý;
- azamattyq pen otansúıgishtikke, óz Otany - Qazaqstan Respýblıkasyna degen súıispenshilikke, memlekettik rámizder men memlekettik tildi qurmetteýge, halyq dástúrlerin qadirleýge, Konstıtýsıaǵa jáne qoǵamǵa qarsy kez kelgen kórinisterge tózbeýshilikke tárbıeleý;
- azamattyq ustanymy belsendi jeke tulǵany tárbıeleý, respýblıkanyń saıası-qoǵamdyq, ekonomıkalyq jáne mádenı ómirine qatysýǵa qajettilikti, tulǵanyń óz quqyqtary men mindetterine sanaly qarym-qatynasty qalyptastyrý;
- balalar boıynda ekologıalyq mádenıetti tárbıeleý, olardy tabıǵatty qorǵaý isine tartý;
- balalardy qoǵamdaǵy ómirge beıimdeý; mazmundy bos ýaqytty uıymdastyrý;
- erekshe bilim berý qajettilikteri bar balalarmen qyzmetterdi uıymdastyrý.
Qaýly 14 sáýirge deıin kópshilik talqylaýda bolady.