Ulttyq bank ótken aıda valútalyq ıntervensıalar júrgizgen joq.
Naýryzdyń qorytyndysy boıynsha, teńge baǵamy 1 AQSH dollary úshin 452,7 teńgege deıin 1,6%-ǵa álsiredi. Al Qazaqstan qor bırjasyndaǵy saýda-sattyqtyń ortasha kúndik kólemi bir aıda 130 mln dollardan 164 mln AQSH dollaryna deıin ulǵaıdy, dep habarlaıdy Almaty-akshamy.kz Azattyq Ruhy-na silteme jasap.
Ulttyq bank málimetine súıensek, saýda-sattyqtyń jalpy kólemi 3,1 mlrd AQSH dollaryn qurady. Bir aı ishinde valúta naryǵynda energıa tasymaldaý baǵasynyń tómendeýi men AQSH-taǵy jáne Eýroaımaqtaǵy bank sektoryna qatysty alańdaýshylyqqa baılanysty naryq qatysýshylary sentımentiniń nasharlaýy aıasynda qubylmalylyq artty.
«Kvazımemlekettik sektor sýbektileriniń valútalyq túsimdi satýy ótken aıda shamamen 253 mln AQSH dollaryn qurady. Kvazımemlekettik sektor kompanıalary ekinshi deńgeıli bankter arqyly valúta naryǵynda satýdy óz betinshe júzege asyrady. Ulttyq qordan respýblıkalyq búdjetke transfertterdi qamtamasyz etý úshin valúta satý naýryzda 721 mln AQSH dollaryn qurady», - delingen qarjy naryǵyn retteýshiniń habarlamasynda.
Ulttyq qordan satý úlesi jalpy saýda-sattyq kóleminiń 23%-yn jáne kúnine 40 mln AQSH dollarynan aspaıtyn mólsherdi kórsetti.
«Ulttyq bank Ulttyq qordaǵy qarajatpen operasıa júrgizý kezinde naryqtyń beıtarap qaǵıdatyn saqtaıdy. Bul shetel valútasyn udaıy ári birkelki satýdy bildiredi. Bul tájirıbe Ulttyq qor operasıalarynyń valúta naryǵyna áserin meıilinshe azaıtýǵa múmkindik beredi. Ulttyq bank BJZQ zeınetaqy aktıvteriniń valútalyq úlesin 30% deńgeıinde ustap turý maqsatynda naýryzda bırjalyq saýda-sattyqta shetel valútasyn satyp aldy. Onyń jalpy somasy 232 mln AQSH dollaryn nemese naryqtyń jalpy kóleminiń shamamen 7%-yn qurady», - delingen habarlamada.
Ulttyq bank naýryzda valútalyq ıntervensıalar júrgizgen joq.Sáýirde Ulttyq qordan satýdyń naqty kólemi Qarjy mınıstrliginiń respýblıkalyq búdjetke transfert bólýge arnalǵan ótinimderine baılanysty bolady. Aldyn ala boljam boıynsha, Qarjy mınıstrliginiń qajetti transfertter somasy boıynsha qazirgi boljamdy baǵdarlarynyń negizinde sáýir aıynda Ulttyq bank Ulttyq qordan 550 mln dollardan 650 mln AQSH dollaryna deıingi mólsherde valúta satýdy josparlap otyr.
«Sáýirde BJZQ zeınetaqy aktıvteriniń valútalyq úlesin ustap turý úshin 200 mln dollardan 250 mln AQSH dollaryna deıingi mólsherde valúta satyp alynýy múmkin. Ulttyq bank transparenttilik qaǵıdaty aıasynda valúta naryǵynda júrgiziletin barlyq operasıa týraly aqparatty tolyq ashyp kórsetetin bolady», - deıdi bank ókilderi.
Qysqa merzimdi perspektıvada teńgeniń dınamıkasy naryqqa qatysýshylardyń kútýlerine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valúta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.