Erteń orta bilim beretin barlyq uıymdarda oqý jyly aıaqtalady.
Almaty qalasynyń bilim berý sapasyn qamtamasyz etý departamentiniń basshysy Gúlnar Ermekbaeva Óńirlik komýnıkasıalar qyzmetiniń brıfıńinde bıylǵy jyly mektep oqýshylary úshin emtıhandar men mektep bitirý keshi qalaı ótkiziletini týraly aıtyp berdi, dep habarlaıdy Almaty-akshamy.kz
Spıker bilim berý sapasyn arttyrý jáne pandemıa, shekteý sharalary kezeńinde jiberilgen bilimdegi olqylyqtardyń ornyn toltyrý maqsatynda 2022 jylǵy 26 mamyr men 17 maýsym aralyǵynda 1-8, 10 synyp oqýshylary úshin árbir bilim berý uıymynyń jazǵy mektebinde oqytý uıymdastyrylatynyn atap ótti.
9, 11-synyp oqýshylary úshin qorytyndy emtıhandar bekitilgen kestege sáıkes, 9-synyptarda 28 mamyrdan 6 maýsymǵa deıin, 11-synyptarda 27 mamyrdan 10 maýsymǵa deıin ótkiziledi. 11-synyp túlekteri Qazaqstan tarıhy boıynsha aýyzsha emtıhan tapsyrady.
«QR Bilim jáne ǵylym mınıstrliginiń mektep bitirý keshin ótkizý boıynsha usynystaryna nazar aýdarǵym keledi. Bıyl mektep bitirý keshi mektep qabyrǵasynda bolady, al atestattardy tapsyrý saltanaty 16-17 maýsymda ótedi. Mektepti bitirýge qatysty barlyq sharalar mektep qabyrǵasynda ótkizilýi kerek. Túlekterdiń ata-analaryna bul is-sharalarǵa shyǵyndanýlarynyń tıimsizdigi týraly eskertemiz», - dedi G. Ermekbaeva.
Onyń aıtýynsha, mektep bitirý keshin bilim berý uıymy óz kúshimen uıymdastyrady. İs-sharaǵa anımatorlardy, merekelik agenttikterdi, aqyly ártisterdi shaqyrýǵa, merekelik otyrystar uıymdastyrýǵa, jalǵa alynǵan avtomobılderde ekskýrsıalar ótkizýge jol berilmeıdi.
«Sondyqtan muǵalimderge, mektepke syılyqtar jınaýǵa qatań tyıym salynǵanyn atap ótkim keledi. Mektep bitirý is-sharalaryn aıaqtaý jáne ótkizý máseleleri boıynsha departamenttiń call-ortalyǵyna kóptegen suraqtar kelip túsýde. Onda barlyǵyna oqý jylynyń aıaqtalýy boıynsha túsinikteme beremiz», - dep atap ótti Almaty qalasynyń bilim berý sapasyn qamtamasyz etý departamentiniń basshysy.