Ulttyq biryńǵaı testileý 16 mamyrda bastaldy, 5 shildede aıaqtalady.
UBT tapsyrý kezinde ashyqtyq pen akademıalyq adaldyqty saqtaýǵa erekshe kóńil bólinedi. Bul týraly Óńirlik komýnıkasıalar qyzmetiniń brıfıńinde Almaty qalasy bilim sapasyn qamtamasyz etý departamentiniń basshysy Gúlnar Ermekbaeva málimdedi, dep habarlaıdy Almaty-akshamy.kz.
Spıker bıylǵy jyldan bastap talapkerlerge UBT tapsyrýǵa jáne grantqa túsýge eki múmkindik beriletinin atap ótti. Eki múmkindiktiń kómegimen mamandandyrylǵan pánderdiń tek bir kombınasıasyn tańdaýǵa bolady. Ulttyq biryńǵaı testileý 16 mamyrda bastaldy, 5 shildede aıaqtalady. Osy ýaqyt aralyǵynda ótken jyldardaǵy mektep, TjKB túlekteri, shartty túrde oqyp jatqandar jáne qandastar da qatysýǵa quqyly.
«Osy jyldan bastap talapkerlerdiń testilik nusqasy akademıalyq adaldyqty saqtaý úshin tańbalanatynyna nazar aýdarǵym keledi (árbir qatysýshy úshin jeke). Ereje buzylǵan jáne test tapsyrmalaryn aýdıtorıadan tys shyǵarýǵa áreket jasalǵan jaǵdaıda, Ulttyq testileý ortalyǵy tártip buzýshylardy anyqtap, olardyń testileý nátıjeleriniń kúshin joıady», - dep atap ótti Gúlnar Ermekbaeva.
Pánderdiń sany ózgerissiz qalady. Al test tapsyrmalarynyń sany – 120. (Onyń ishinde Qazaqstan tarıhynan - 15, matematıkalyq saýattylyqtan - 15, oqý saýattylyǵynan - 20 jáne eki beıindik pánnen – 35). Eń joǵarǵy upaı sany – 140.
Almaty qalasy bilim sapasyn qamtamasyz etý departamentiniń basshysy erekshe bilim berýdi qajet etetin talapkerlerge qolaıly jaǵdaı jasaý úshin alǵash ret negizgi 240 mınýtqa qosymsha taǵy 40 mınýt berilgendigi týraly aıtty. Sonymen birge olar úshin test nusqalary sýrettersiz, dıagramlarsyz jáne syzbalarsyz ázirlendi.
Spıkerdiń aıtýynsha, grantqa túsý úshin UBT tapsyrýdyń eki múmkindigi tıimdilikti arttyrady jáne balalardyń kúızelisin azaıtady. Jyl saıyn test tapsyrmalarynyń bazasy 30%-ǵa jańartylyp otyrady. Bul rette reprodýktıvti sıpattaǵy emes, shyǵarmashylyq sıpattaǵy, zertteý, sıntezdeý jáne taldaý qabiletine, ıaǵnı oqýshylardyń óz bilimderin is júzinde qoldanýyna arnalǵan, jaýaptary jattalatyn emes, suraqtar engiziledi. UBT tapsyrýdyń eki áreketi de tegin bolady jáne olardyń nátıjeleri grant alý konkýrsyna qatysýǵa jaramdy bolady.
UBT kezinde kompúter ekranynda kálkýlátor, Mendeleev kestesi jáne metaldardyń birqatar belsendiligi qosylǵan tuzdardyń erigishtigi kestesi qoljetimdi bolady.
Úmitkerler testileý aıaqtalǵannan keıin 30 mınýt ishinde apelásıaǵa bere alady. Sertıfıkat appelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
UBT kezinde ashyqtyq pen akademıalyq adaldyqty saqtaýǵa erekshe kóńil bólinedi. Bıyl aqparattyq qaýipsizdikti qamtamasyz etý maqsatynda UBT «1 kompúter – 2 kamera - 1 testilenýshi» qaǵıdasy boıynsha ótkizilip jatyr. Talapkerdiń test tapsyrý ornynda negizgi kameradan basqa tulǵany anyqtaýǵa jáne bógde adamdardyń kirýine jol bermeýge múmkindik beretin qosymsha frontaldy veb-kamera ornatylǵan.
«Birinshi múmkindikte ereje buzylǵan jaǵdaıda, test nátıjeleri joıylady jáne talapkerge ekinshi múmkindik berilmeıdi. Al birinshisinen sátti ótip, ekinshi múmkindikte belgili bir erejelerdi buzsa, ekeýiniń de nátıjesi joıylady jáne konkýrsqa qatysa almaıdy. Sondyqtan árbir talapkerdi akademıalyq adaldyqty saqtaýǵa shaqyramyz», - dep habarlady Gúlnar Ermekbaeva.
Árbir ata-ana UBT-diń ótý barysyn kóre alady. Barlyq beınejazba testileýden keıin tekseristen ótedi. Testileýge qatysýshy tártip buzǵan jaǵdaıda nátıjesi joıylady, grant ıegeri bolyp jatsa da, grantynan aıyrylady.