QR Bilim jáne ǵylym mınıstri pedagogterdiń kásibı qyzmetin júzege asyrýy úshin qolaıly jaǵdaı jasaý maqsatynda «Pedagogter quqyqtarynyń buzylýyna jol bermeý týraly» 2022 jylǵy 27 sáýirdegi №172 buıryqqa qol qoıdy. Bul týraly Óńirlik komýnıkasıalar qyzmetiniń brıfıńinde Almaty qalasy bilim sapasyn qamtamasyz etý departamentiniń basshysy Gúlnar Ermekbaeva málimdedi, dep habarlaıdy Almaty-akshamy.kz.
Qalanyń, aýdandardyń bilim berýdi basqarý organdary men bilim berý uıymdaryna pedagogterdiń kásiptik qyzmetin júzege asyrýy kezinde mynalarǵa jol berilmeıdi:
QR zańnamasyna sáıkes, ázirlengen laýazymdyq nusqaýlyqtarda kózdelmegen jumys túrlerine tartýǵa;
Pedagogter júrgizýge mindetti qujattar tizbesinde kózdelmegen eseptilikti ne aqparatty talap etýge;
QR Ákimshilik rásimdik prosestik kodeksinde kózdelmegen tekserýlerdi júrgizýge;
Olarǵa taýarlar men qyzmetterdiń ártúrli túrlerin satyp alý boıynsha mindetter júkteýge.
Bul rette bilim berý uıymdary qajetti aqparatty tek QR BǴM-niń, sondaı-aq qalanyń, aýdannyń bilim berýdi basqarý organdarynyń suratýlaryna QR zańnamasynda belgilengen tártippen usynýy tıis.
Sondaı-aq, G. Ermekbaeva joǵary turǵan memlekettik organdardyń nemese laýazymdy tulǵalardyń tapsyrmasy boıynsha is-sharalardy bilim berý salasyndaǵy memlekettik saıasattyń negizgi qaǵıdattaryna, «Bilimdi ult» sapaly bilim berý» ulttyq jobasyna, memlekettik jalpyǵa mindetti bilim berý standartyna, sondaı-aq mınıstrliktiń jumys josparyna sáıkes júrgizý qajettigin atap ótti.
Bilim berýdi basqarý organdary osy buıryqtyń tarmaqtaryn, onyń ishinde pedagog quqyǵyn buzǵan jaǵdaıda Komıtettiń aýmaqtyq bólimshelerine, ıaǵnı bizdiń departamentke júginýge quqyly. Komıtet pen aýmaqtyq departamentter QR «Pedagog mártebesi týraly» zańynyń talaptaryn buzǵan tulǵalarǵa qatysty túbegeıli sharalar qabyldaıdy. Osy buıryqpen bilim berý uıymynyń árbir basshysy tanysyp, pedagogterge jetkizýi tıis.