Bıylǵy oqý jylynda Almaty qalasynda oqýshylardy tegin tamaqpen qamtamasyz etý 40%-ǵa artty.
Eger ótken oqý jylynda tek 19 myń oqýshy (nemese oqýshylardyń 7%) tegin tamaqpen qamtamasyz etilse, bıyl shamamen 133 myń (45,3%) qamtyldy. Osylaısha, barlyq bastaýysh synyp oqýshysynyń tegin tamaqpen 100% qamtylýyn qosqanda oqýshylardy tegin tamaqpen qamtý 38,3%-ǵa ósti, dep habarlaıdy Almaty-akshamy.kz.
Esterińizge salaıyq, qala ákimi Erbolat Dosaevtyń bastamasymen 1-4 synyp oqýshylaryn tegin tamaqpen qamtamasyz etý boıynsha alǵashqy pılottyq joba el kóleminde alǵash ret bıylǵy oqý jylynyń 1 qyrkúıeginde Almaty qalasynda bastaldy. Buǵan deıin áleýmettik osal otbasylardan shyqqan bilim alýshylar ǵana tegin tamaqpen qamtamasyz etiletin.
«Sapaly bilim berýdiń mańyzdy sharty – oqýshylardy sapaly azyqpen qamtamasyz etý. Sondyqtan otbasylardy memlekettik qoldaýǵa erekshe kóńil bólinedi. Biryńǵaı standarttarǵa sáıkes, 4 aptalyq tegin tamaqtaný máziri bekitildi. Ol bilim basqarmasynyń jáne bilim berý uıymdarynyń saıtynda jazylǵan. Qazir barlyq bilim berý uıymynda tamaqtaný sapasyna kúndelikti monıtorıń júrgizetin komısıa bar. Quramyna medısına qyzmetkerleri, mektep ákimshiligi jáne ata-analar qaýymynyń ókilderi kiredi. Tamaqtanýdy uıymdastyrýǵa bilim berý uıymynyń basshysy derbes jaýapty ekenin atap ótemin. Biz ár oqýshynyń sapaly tamaqtanýyn qamtamasyz etýdi jalǵastyramyz», - dedi Almaty qalasy bilim basqarmasynyń basshysy Lázzat Jylqybaeva.
Aıta keteıik, qazir 1-4 synyp oqýshylary jáne áleýmettik qorǵalmaǵan jáne az qamtylǵan otbasylardan shyqqan 5-11 synyp oqýshylary 100%-y tegin tamaqpen qamtamasyz etilgen.
Qala mektepterinde tamaqtaný sapasyn arttyrý úshin asqanalar sıfrlandyrylady. Bul qolma-qol aqshasyz esep aıyrysý boıynsha pılottyq jobalar, tegin tamaqtanýdy elektrondyq tabeldeý jáne t. b.
Bul baǵyttaǵy jumys jalǵasady.