Memlekettik mektepterdiń janynan ashylǵan jylyjaıda oqýshylar teorıalyq bilimin tájirıbemen baıytýda.
Shaǵyn jylyjaıda qıar, burysh, qyzylsha, askók syndy kókónisterdi oqýshylardyń ózderi baptaıdy. Jemisin jınap, jármeńke jasap turady eken. Jylyjaıdan túsken qarajat qaıyrymdylyqqa aýdarylady, dep habarlaıdy Almaty-akshamy.kz 24.kz-ke silteme jasap.
Osy bastamaǵa negiz bolǵan «Jasyl mektep» jobasy osydan úsh jyl buryn qolǵa alynǵan.
Almaty qalasynyń 16 mektebinde dál osyndaı jylyjaı jumys isteıdi. 2021 jyly qoldanysqa berilgen jylyjaılardyń ishi tolyqtaı avtomattandyrylǵan. Iaǵnı, jylý, tamshylatyp sýarý, últra kúlgin sáýle barlyǵy avtomatty túrde jumys isteıdi. Mundaǵy oqýshylar tek qana kókónisterdi baptap, baqylaýmen ǵana aınalysady.
Munda oqýshylar tájirıbelik sabaq ótkizip, ekologıa, bıologıa pánderinde alǵan teorıalyq bilimin jetildiredi. Ustazdardyń aıtýynsha, baqshany baptap, kókónisti ósirýdiń qyr-syryn meńgergen oqýshylar erteń ekologıa janashyry bolyp ósedi.
«Árbir sabaqta biz jylyjaıǵa kelip, bul jaqta ósimdikterdiń qalaı ósetinin, olardy qalaı ósirý kerek, qansha mm sý quıý kerek ekenin bildim. Olardyń aram shópterin qalaı julý kerek ekenin, qalaı ósirý kerek ekenin, olarǵa qandaı qaýipsizdikter kerek ekenin, temperatýrasy qansha bolý kerek ekenin bildim», - deıdi 6-synyp oqýshysy Shapaǵat Temirbek.
Oqýshylar ósirgen kókónister mektep asqanasynda da paıdalanylady. Munda ósken qıar, qyzylshanyń, burysh pen qyzanaqtyń sapasy óte joǵary. Oqýshylar kólemi 60 sharshy metr jerden tonnalap ónim almasa da, jylyjaı óndirisiniń álippesin úırenip shyǵady. Bolashaqta agrobıznespen aınalysyp jatsa, munda alǵan bilimderiniń kádege jaraıtyny sózsiz. Sonymen qatar, joǵary synyp oqýshylary dástúrli kókónisterden basqa ósimdikterdi jersindirý, býdandastyrý ádisterin de iske asyrady eken.
«Biz esperıment retinde ár jyly ózimizdiń mektebimizdiń aınalasyn kógaldandyrý aıasynda ... aqpan aılarynda ártúrli gúlderdiń túrlerin otyrǵyzamyz jáne sol arqyly kógaldandyramyz. Bıylǵy bir qyzyq jaǵdaı, biz birinshi ret Qytaı qyzyl raýshanyn otyrǵyzyp kórmekshimiz», - deıdi №201 mektep-gımnazıasynyń bıologıa páni muǵalimi Oljas Serikbaev.
Odan bólek jylyjaı jumysyn bastaǵan eki jylda oqýshylar úsh ret mol ónim alǵan. Sonyń arqasynda kókónister jármeńkesi uıymdastyrylypty. Satylymnan túsken qarajat áleýmettik az qamtylǵan otbasylarǵa kómek retinde úlestirilgen.