Almatyda 9-11 synyp oqýshylary men kolej stýdentteri arasynda aı saıynǵy kásiptik baǵdar ótýde.
Jyl basynan beri áleýmettik kásiptik baǵdarlaýdan 15 myńǵa jýyq oqýshy ótti. Keńes berý, testileý jáne nátıjelerdi talqylaý jastarǵa bolashaq mamandyqty sanaly túrde tańdaýǵa jáne bolashaqta jumysqa oıdaǵydaı ornalasýǵa kómektesedi,-dep habarlaıdy Almaty-akshamy.kz.
Kásibı baǵdar oqýshynyń qyzyǵýshylyǵy men qabiletin zertteýge, ony mamandyq álemimen jáne olardy tańdaý erejelerimen tanystyrýǵa, sondaı-aq kásibı bolashaqta motıvasıany qalyptastyrýǵa baǵyttalǵan. Sondaı-aq, bul eńbek naryǵynyń daǵdylary men qajettilikterin eskere otyryp, qyzmet salasyn ózgertýge nemese biliktilikti arttyrýǵa múmkindik beredi.
"Qazir oqýshylardyń, stýdentterdiń jáne jumyssyzdardyń basym kópshiligi kásiptik baǵdarlaýdy qajet etedi. Kóbinese jastar mamandyq tańdaýda qıyndyqtarǵa tap bolady. Sondyqtan osy qyzmetti kórsetý formalary ártúrli. Aı saıyn jumyspen qamtý ortalyǵynyń mamandary oqý oryndaryna barady, kásibı ózin-ózi anyqtaý úshin testileý, dárister, sheberlik synyptary, trenıńter jáne basqa da sabaqtar ótkizedi. Birinshi kezekte kásiptik baǵdar berý oqýshylar úshin mańyzdy, óıtkeni olar jaqyn arada mamandyqty anyqtaýy kerek", — dedi Almaty qalasy jumyspen qamtý jáne áleýmettik baǵdarlamalar basqarmasynyń basshysy Nazıra Toǵyzbaeva.
Eske salsaq, bolashaq mamandyqty durys tańdaı almaý saldarynan kolejde nemese ýnıversıtette oqý kezinde stýdenttiń tańdaǵan mamandyǵyna kóńili tolmaıdy. Qoǵamdaǵy jańa úrdister el ekonomıkasyn damytý úshin balalar men jastardy kásiptik baǵdarlaýdyń mańyzdy ekenin kórsetýde.
Aıta keterligi, kásiptik baǵdar berýmen qyzmet kórsetilgen sátten bastap qalada 62 myńǵa jýyq oqýshy men stýdent qamtylǵan. Jańa kásipter týraly qosymsha aqparatty Jańa kásipter men quzyretter atlasy saıtynan alýǵa bolady (enbek.kz).
Kásiptik baǵdarlaý boıynsha jumys Almaty qalasynyń bilim basqarmasymen birlesip júrgiziledi.
Almaty qalasynyń jumyspen
qamtý jáne áleýmettik baǵdarlamalar basqarmasy