Almaty men Astanada kórermenderdiń nazaryna erte júktilik máselesin kóteretin derekti fılm usynyldy.
«Jaryq sáýlesi» bastamasy aımaqtyq baǵdarlamasynyń qoldaýymen «Tochka» agenttigi men «Nukte» YouTube arnasy birlesip túsirgen «Erte júktilik» derekti fılminiń jabyq kórsetilimi ótti, dep habarlaıdy Almaty-akshamy.kz.
Fılmniń avtorlary jasóspirimderdiń psıhologıalyq jetilmegendigi, olardyń jaqyndary men qoǵam qoldaýynyń bolmaýy, júktilik pen ana bolý problemasyna tap bolǵan jasóspirimderge kómek alý úshin qajetti aqparat pen arnalardyń jetispeýshiligi taqyrybyn kóteredi. Jasóspirimderdiń júktiligi – otbasy jáne qoǵamǵa medısınalyq, áleýmettik jáne ekonomıkalyq turǵydan áser etetin jahandyq qubylys. Sonymen qatar, jasóspirimderdiń júktiliginiń jalpy sanynyń astarynda jynystyq zorlyq-zombylyq jatqanyn umytpaýymyz kerek. DDU málimetteri boıynsha, 15-19 jas aralyǵyndaǵy jasóspirimderdiń 24%-y ómirinde kem degende bir ret seriktesinen fızıkalyq nemese jynystyq zorlyq-zombylyqqa ushyraǵan.
Qazaqstanda 2021 jyly QR Strategıalyq josparlaý jáne reformalar agenttigi Ulttyq statısıka búrosynyń derekteri boıynsha 5774 balany 15 pen 18 jas aralyǵyndaǵy jasóspirim qyz dúnıege ákelgen.
Aıyptaý men stıgmanyń aýyrtpalyǵynan basqa, erte júktilik kóbinese jasóspirim analardyń fızıkalyq jáne psıhologıalyq densaýlyǵyna kóptegen keri áserin tıgizedi. Olardyń 50%-dan astamy orta mektepti aıaqtamaıdy. Bilim alýdan jáne sonyń saldarynan eńbek naryǵynda jaramsyz bolyp qalý olardy turaqty tabys alý múmkindiginen aıyrady jáne genderlik zorlyq-zombylyq qaýpi joǵary bolatyn qarym-qatynasqa ákelýi múmkin.
Sábıdiń dúnıege kelýi úshin kámeletke tolmaǵan ata-analardyń birdeı azamattyq jaýapkershilik mádenıetin damytý qoǵam úshin mańyzdy mindet bolyp tabylady. Óıtkeni búgingi kúni erte júktilik úshin jaýapkershilik uǵymy er adamdarǵa qoldanylmaıdy. Erte júktilik týraly derekti fılmdi 2022 jyldyń 20 sáýirinde «NE boldy» YouTube arnasynan kórýge bolady.