Talǵar aýdanynda alıment tóleýden jaltaryp júrgen 26 boryshker ákimshilik jaýapkershilikke tartylǵan
«Alıment - qaryz emes, paryz». Osy ustanymdy uran etken Almaty oblysy Talǵar aýdanynyń jeke sot oryndaýshylary perzenti aldynda qaryzy bar jumyssyz ákelerdiń eki qolǵa bir kúrek tabýyna septesti. Olar bos jumys oryndar jármeńkesin arnaıy 1 maýsym – Balalar kúnine oraı uıymdastyryp otyr, dep habarlaıdy Almaty-akshamy.kz Almaty.tv-ge silteme jasap.
41 jastaǵy Roman Sashkov – Almaty oblysynyń turǵyny. Jubaıymen ajyrasqanyna 10 jyl bolypty. Kámeletke tolmaǵan bir qyzy bar. Ózi jeke kásipker. Alaıda alımentti 4 jyl boıy durys tóleı almaı, qaryzy 1 mıllıon 700 myń teńgege jýyqtap qalypty. Endi eki qolǵa bir kúrek tabý úshin osy jármeńkege kelip, ózine qajet jumysty tapqanyn aıtady.
– Árbir áke balasy úshin jaýapty. Sondyqtan perzentiniń jaǵdaıyn jasap, alımentti tóleýi qajet. Men de bul jaýapkershilikten qashpaımyn. Sondyqtan osy jármeńkege kelip otyrmyn. Munda túrli jumys usynyldy. Unaǵany – júk kóliginiń júrgizýshisi. Endi tájirıbeden ótip kóremin, – dedi boryshker Roman Sashkov.
Almaty oblysyna qarasty Talǵar aýdanynda jyl basynan beri alıment tóleýden jaltaryp júrgen 26 boryshker ákimshilik jaýapkershilikke tartylǵan. 10-nan astam is qylmystyq jazaǵa tartýǵa, 5 is sotqa joldanǵan. Tórt azamatqa úkim shyǵypty. Qalǵandaryna qatysty tergeý amaldary jalǵasyp jatyr.
– Talǵar aýdanynda 3 myńnan astam alıment óndirý týraly atqarýshy is qozǵalǵan. Ol atqarýshy isterdiń arasynda boryshkerlerdiń qaryzy 394 mıllıon teńgeden asady. Osy jyldyń 1 qańtarynan bastap jeke sot oryndaýshylarymen 75 mıllıonnan astam qaryz óndirildi, – dedi oblystyq atqarýshylyq okrýginiń jeke sot oryndaýshysy Álibek Rahmetov.
«Perzenti aldyndaǵy qaryzyn óteýden jaltaryp júrgender arasynda 10-ǵa jýyq kókek ana bar», - deıdi jeke sot oryndaýshylary. Qazir olardyń da isi qaralyp jatyr. Aıta keteıik, aýdanda jyl basynan beri 32 boryshker jumyssyzdar esebinde tur. Al búgin bos oryndar jármeńkesine kelgen 15 azamattyń jeteýi eki qolǵa bir kúrek tapty. Olarǵa kólik júrgizýshi, júk tasýshy, dánekerleýshi, qoıma qyzmetkeri sekildi jáne mamandyǵy boıynsha birqatar jumys usynyldy.