Almaty qalasynda jańa Qurylys erejeleri men Qala qurylysy reglamenti ázirlendi. Bul qujattar boıynsha qaladaǵy qurylysqa qatań shekteýler engizilmek. Bul týraly Almaty ákimi Erbolat Dosaev Ortalyq komýnıkasıalar qyzmetindegi brıfıńte málimdedi, dep habarlaıdy aqshamnews.kz
«Meniń ákim retindegi jumysym núktelik qurylysty retteýden bastaldy. Memleket basshysynyń tapsyrmasymen 19 nysan anyqtaldy. Keıbirin súrýge, al keıbirin satyp alýǵa týra keldi. Barlyq másele sheshildi. Jańa Qurylys erejeleri men Qala qurylysy reglamentinde bul máselelerdiń bári bekitildi», – dedi ákim.
2022 jyldyń basynan beri qurylysqa baqylaýdy kúsheıtý aıasynda Almatyda 69 qurylys nysany tolyq nemese jartylaı súrilgen, onyń ishinde 26 turǵyn úı jáne 43 turǵyn emes ǵımarattar. Negizgi buzýshylyqtarǵa qajetti ruqsat qujattarynyń bolmaýy jáne kelisilgen eskızdik jobadan aýytqýlar jatady. Mundaı nysandardy súrý tek sot sheshimi boıynsha júzege asyrylady.
«Biz úlken jumys atqardyq. Qala qurylysyna qatań shekteýler engizetin jańa erejelerdi ázirledik. Bul núktelik qurylystardy, taý bókterleri men jasyl aımaqtardy ıgerý jáne aýlalyq aýmaqtardy zaqymdaýdy boldyrmaýǵa baǵyttalǵan», – dedi Dosaev.
Jańa erejelerge sáıkes, Abylaı han dańǵyly men ál-Farabı dańǵyly arasyndaǵy aýmaqta tek erekshe nysandardy qospaǵanda, bıiktigi 9 qabattan aspaıtyn turǵyn úıler ǵana salýǵa ruqsat etiledi.
Qurylys tek qoǵamdyq mańyzdylyqty negizdeıtin sáýlet-qala qurylysy sheshimderiniń bolýy, jobanyń ekologıalyq turaqtylyǵy men resýrstardy únemdeýge arnalǵan tehnologıalardy qoldaný sharttarynda ǵana ruqsat etiledi.
VOAD-tyń ońtústik bóliginde, ál-Farabı dańǵylynyń, Saın jáne Jandosov kósheleriniń boıyndaǵy taý bókterlerinde, sondaı-aq 15 gradýstan asatyn kólbeý alańdarda qurylys júrgizýge tyıym salynady. Terasalar men tehnıkalyq qabattardy qaıta jabdyqtaý da ruqsat etilmeıdi.
Sonymen qatar, Almatyda III klastan tómen turǵyn úıler salynbaıdy. Barlyq kóppáterli turǵyn úı keshenderin qabyldaý men paıdalanýǵa berý kezinde memlekettik organdardyń baqylaý fýnksıalary kúsheıtiledi. Arhıtektýralyq-qurylys baqylaý organdarynyń ókilettikteri de keńeıtiledi.
Jańa erejeler qazirgi ýaqytta sarapshylar men qoǵamnyń talqylaýyna ashyq qoljetimdilikte. Jyl sońyna deıin olar máslıhat depýtattarynyń qaraýyna usynylyp, 2025 jyldyń basynda kúshine enýi múmkin.
«Eger máslıhat jańa Qurylys erejeleri men Qala qurylysy reglamentin bekitse, biz qaladaǵy jumys sharttaryn naqty bekitip, retteýsiz qalǵan tulǵalardyń taý bókterlerin ıgerip, zańsyz úıler salý máselesin sheshemiz. Bul, eń aldymen, olardyń qaýipsizdigi úshin mańyzdy», – dedi Erbolat Dosaev.