Almatyny baqsha-qala retinde qaıta jandandyrý aıasynda shamamen 643 myń kóshet otyrǵyzyldy. Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte jýrnalıserdiń suraǵyna jaýap berý barysynda málimdedi, dep habarlaıdy aqshamnews.kz
«Ótken jyldyń qańtar aıynan bastap jasyl jelekterdi kútý jáne otyrǵyzý boıynsha jańa erejeler engizildi, onda standarttar ózgertildi. Kóshetterdiń bıiktigi keminde 2-2,5 metr bolýy tıis. Kelesi jyly biz tájirıbe retinde bıiktigi 4-6 metr bolatyn 27 myń iri aǵash otyrǵyzýdy bastaımyz. Bul qaladaǵy jaıly orta qalyptastyrýǵa jáne kóshetterdiń jersiný kórsetkishin arttyrýǵa baǵyttalǵan shara. Sebebi álsiz kóshetter agressıvti qalalyq ortada ómir súre almaıdy», – dep túsindirdi Erbolat Dosaev.
Sonymen qatar, jańa erejelerge sáıkes, merdiger uıymdar sýarý júıesin ornatyp, kóshetterdi úsh jyl boıy kútip-baptaýǵa mindetti. «Osy sharalardyń arqasynda kóshetterdiń jersinbeý deńgeıin 30%-dan 10%-ǵa deıin tómendetý múmkin boldy», – dep atap ótti qala basshysy.
Ákimniń aıtýynsha, sońǵy eki jylda qalada 500 shaqyrym avtosýarý jáne tamshylatyp sýarý júıesi ornatyldy. 2025 jylǵa deıin taǵy 290 shaqyrym sýarý jelisi salynyp, bul bir mıllıonnan astam aǵashqa sapaly sýarýdy qamtamasyz etedi.
Erbolat Dosaev, sondaı-aq, 2022 jyly qalada 84 myń apatty aǵash bolǵanyn, olardyń 40,5 myń danasy kesilgenin, qalǵan apatty aǵashtardy 2025-2026 jyldary kesý josparlanyp otyrǵanyn aıtty.
Jalpy, Almatyda 4,3 mıllıonnan astam jasyl jelek bar, onyń 2,3 mıllıony jalpy paıdalanymdaǵy jerlerde ornalasqan.