QR Qarýly kúshteri Desanttyq-shabýyldaý áskerleriniń qolbasshysy general-maıor Almaz Jumakeevtiń basshylyǵymen «Myzǵymas baýyrlastyq-2024» bitimgerlik kúshterdi komandalyq-shtabtyq oqý-jattyǵýǵa daıyndaý jónindegi ekinshi shtabtyq kelissózder ótti, dep habarlaıdy almaty-akshamy.kz.
Oǵan Belarýs, Qazaqstan, Qyrǵyzstan, Reseı, Tájikstan múddeli vedomstvolar ókilderi, general-leıtenant Rýslan Shpekbaev basqaratyn Birikken shtab ofıserleriniń toby jáne UQSHU Hatshylyǵynyń qyzmetkerleri qatysty.
İs-shara barysynda osy jyldyń qyrkúıek aıynda Almaty oblysynyń «Jaǵalaý» polıgonynda ótetin oqý-jattyǵý aýmaǵyna barlaý júzege asyryldy.
Taraptar oqý-jattyǵýdyń ıdeıasyn, UQSHU Ujymdyq bitimgerlik kúshterine bólinetin birlesken qolbasshylyq pen ulttyq kontıngentterdiń quramdaryn, praktıkalyq is-qımyldardyń tártibin, sondaı-aq jan-jaqty qamtamasyz etýdi uıymdastyrý máselelerin qarap, kelisti.
Ekinshi shtabtyq kelissózderdiń qorytyndysy boıynsha delegasıa basshylary tıisti hattamaǵa qol qoıdy.
Esterińizge sala ketsek, UQSHU-ǵa múshe elderdiń bitimgerlik kontıngentterine arnaıy daıyndalǵan ásker, mılısıa (polısıa) jáne azamattyq personal, sondaı-aq Uıymǵa múshe memleketter bóletin kúsh-quraldar kiredi. Olardyń jalpy sany 4000-ǵa jetip jyǵylady.
Atalmysh oqý-jattyǵý UQSHU áskerleriniń toptaryn basqarý organdary laýazymdy tulǵalarynyń praktıkalyq daǵdylaryn arttyrý jáne Ujymdyq qaýipsizdik júıesi quramalarynyń, kúsh-quraldarynyń is-qımylyn úılestirý maqsatynda ótkiziledi.
Qazaqstannyń bıylǵy jyly uıymǵa tóraǵalyq etý kezeńinde málimdelgen basymdyqtardyń biri – UQSHU-nyń bitimgerlik áleýetin damytý.