2024 jylǵy 25-27 maýsym aralyǵynda "QTJ" UK" AQ kompanıalar tobynyń delegasıasy Shanhaı qalasynda (QHR) ótken Transport Logistic China 2024 halyqaralyq kóliktik-logıstıkalyq kórmesine qatysty.
Transport Logistic China 1978 jyldan beri ótkizilip kele jatqan kólik, logıstıka, aqparattyq tehnologıalar jáne jetkizý tizbegin basqarý salasyndaǵy jetekshi álemdik kórme, dep habarlaıdy Almaty-akshamy.kz.
Bıyl Transport Logistic China kórmesi óz alańynda álemniń túkpir-túkpirinen 600-den astam kórme qatysýshylaryn ornalastyrdy. Germanıa, Italıa, Chehıa, Sıngapýr, Saýd Arabıasy jáne basqa elderdiń ulttyq pavılondary usynylǵan.
Kórmege qatysýshylar men kelýshiler "QTJ" UK" AQ stendine erekshe qyzyǵýshylyq tanytty. "KTZ Express" AQ jáne "Kedentransservıs" AQ ókilderi kóliktik-logıstıkalyq kompanıalarmen birqatar kezdesýler ótkizip, Qazaqstan aýmaǵy arqyly ótetin marshrýttardyń artyqshylyqtary, usynylatyn servıster týraly habardar etti jáne ózekti bolyp tabylatyn Qytaıdan Qazaqstan arqyly júk aǵynyn ulǵaıtý jónindegi múmkindikterdi jáne konteınerlik tasymaldardy odan ári damytý perspektıvalaryn talqylady.
Kórme aıasynda halyqaralyq júk temirjol ekspresiniń jańa damýy — teńiz kontınentaldy Jibek joly logıstıkasy boıynsha samıt ótti, onda "QTJ" UK" AQ kompanıalar tobynan "KTZ Express" AQ Bas dırektorynyń logıstıka jónindegi orynbasary Aıbek Qapar baıandama jasap, Qazaqstannyń temirjol kóligi salasyndaǵy kólik saıasatyn damytýdyń basym baǵyttaryn atap kórsetti. Spıker sonymen qatar Qazaqstannyń tranzıttik áleýeti jáne ınfraqurylymdyq jobalar týraly da sóz qozǵady.
İs-shara barysynda qatysýshylar Qytaı - Eýropa baǵytynda qyzmetterdi ilgeriletý jáne jaqsartý múmkindikteri týraly pikir almasty jáne syndarly dıalog júrgizdi.