Qurmanǵazy atyndaǵy Qazaq ulttyq konservatorıasynda «Búgingi mýzykalyq túrkologıa: máseleleri men bolashaǵy» atty halyqaralyq ǵylymı-praktıkalyq konferensıa ótti.
Atalmysh is-shara 1994 jyly Almatyda ótken «Túrki halyqtarynyń mýzykasy» atty alǵashqy halyqaralyq sımpozıýmnyń 30 jyldyǵyna oraı uıymdastyryldy, dep habarlaıdy aqshamnews.kz.
1994 jylǵy sımpozıým mýzykalyq túrkologıany jeke ǵylymı baǵyt retinde qalyptastyrýyna jáne jańa zertteýshi býyn shyǵarýǵa zor yqpal etti. 2025 jylǵy konferensıa osy dástúrdi jalǵastyryp, oǵan Qazaqstannan, túrki memleketterinen, sondaı-aq Reseı, Germanıa, Japonıa, AQSH, Polsha jáne Slovakıadan kelgen jetekshi mamandar jınaldy.
Konferensıa Qazaqstan Respýblıkasynyń Mádenıet jáne aqparat mınıstrligi men Túrki mádenıeti men murasy qorynyń qoldaýymen uıymdastyryldy.
Konferensıa aıasynda plenarlyq otyrystar, taqyryptyq seksıalar, «Túrkitildes elderdiń ulttyq mýzykalyq aspaptary» atty halyqaralyq ǵylymı basylymnyń tusaýkeseri, sheberlik sabaqtary men tanymal mýzykanttardyń qatysýymen «Túrki áleminiń dástúrli jáne zamanaýı mýzykasy» atty konsert ótti.
Sondaı-aq konferensıa aıasynda Qurmanǵazy atyndaǵy Qazaq ulttyq konservatorıasy bazasynda Túrki mýzykalyq mádenıeti men murasy ortalyǵynyń saltanatty ashylýy rásimi ótti. Bul ortalyq Túrki mádenıeti men murasy qorynyń qoldaýymen qurylyp, oǵan Bolat Qaraqulovtyń esimi berildi.