Qazaqstannyń Tótenshe jaǵdaılar mınıstrligi el óńirlerinde «Jas qutqarýshylar» kadet synyptary júıesin belsendi damytýdy jalǵastyrýda.
Elimizdegi alǵashqy «Jas qutqarýshylar» kadet synyby 2019 jyly Almaty oblysy İle aýdanynyń Ótegen-Batyr aýylynda quryldy. Búgingi tańda Qazaqstanda osyndaı shamamen 20 synyp jumys isteıdi, olardyń sany artýda, dep habarlaıdy aqshamnews.kz.
Bul bastama jastar arasynda qaýipsizdik mádenıetin qalyptastyrýǵa, qutqarýshy mamandyǵyna qyzyǵýshylyqty damytýǵa jáne jaýapty, daıyndyqtan ótken azamattardy tárbıeleýge baǵyttalǵan.
Jaqynda Túrkistan jáne Oral qalalarynda saltanatty túrde jańa kadet synyptary ashyldy.
Túrkistanda birinshi kadet synyby «Nomadschool» ınovasıalar mektebiniń bazasynda quryldy, oǵan 8-synyp oqýshylary qabyldandy.
«Kadet synybynyń ashylýy-tótenshe jaǵdaılarda jedel jáne saýatty den qoıýǵa daıyn azamattardyń jańa býynyn qalyptastyrýdaǵy mańyzdy qadam. Balalardy qaýipsizdik negizderine úırete otyryp, biz qoǵamymyzdy qorǵaýdyń berik irgetasyn qalaımyz», - dep Túrkistan oblysy TJD bastyǵynyń birinshi orynbasary Dýman Qydyrmollaev atap ótti
Batys Qazaqstan oblysynda kadet synyby Oral qalasynyń № 40 mektebiniń bazasynda «Qutqarýshy bolý — úlken batyldyqtyń kórinisi» uranymen ashyldy. Synypqa 8-11 synyptardyń 20 oqýshysy qabyldandy.
Oqýshylar saltanatty túrde ant qabyldap, arnaıy kýálikter aldy.
«Biz bul kadet synyptarynda formaldy jańashyldyqty ǵana emes, jaýapty, daıyndalǵan jáne sanaly azamattardy tárbıeleýdiń naqty tetigin kórip otyrmyz», — dep Batys Qazaqstan oblysy TJD bastyǵynyń mindetin ýaqytsha atqarýshy Janbolat Janshın atap ótti.
Oqý baǵdarlamasy ómir qaýipsizdigi negizderin, saptyq daıyndyqty, azamattyq qorǵaýdy jáne dárigerge deıingi medısınalyq kómekti qamtıdy. Tájirıbelik sabaqtarǵa jáne vedimistik is-sharalarǵa qatysýǵa da erekshe kóńil bólinedi.
Kadet synyptaryndaǵy oqý baǵdarlamasy tek teorıaǵa ǵana emes, sondaı-aq praktıkalyq daǵdylardy damytýǵa baǵyttalǵan. Azamattyq qorǵanys pen alǵashqy medısınalyq kómek kórsetýden basqa, oqýshylar alǵashqy áskerı daıyndyqty oqıdy jáne tótenshe jaǵdaılarda — órtten sý tasqynyna deıingi áreketterdi pysyqtaýǵa baǵyttalǵan mamandandyrylǵan fakúltatıvterden ótedi.
«Jas qutqarýshylar» synyptaryn qurý jáne damytý bilim berý júıesindegi jáne jastardy qazirgi jaǵdaıda ómirge daıyndaýdaǵy mańyzdy kezeńge aınalýda.
Qazaqstannyń TJM baǵdarlamany búkil respýblıka boıynsha keńeıtýdi jalǵastyrýǵa, aınalasyndaǵylardyń ómiri men densaýlyǵyn qorǵaýǵa daıyn azamattardyń jańa býynyn tárbıeleýge nıetti.