Almaly aýdanyna jumys sapary barysynda Almaty ákimi Darhan Satybaldy jóndeý jumystary júrip jatqan A.Imanov atyndaǵy skverge bardy. Munda kespe tastar tóselip, syrtqy jıhazdar jańartylyp, pergola ornatylypty. Buǵan deıin turǵyndardyń ótinishimen balalardyń oıyn alańy men ıt serýendeýge arnalǵan aýmaq jasalǵan bolatyn.
Skver Músirepov atyndaǵy teatrdyń mańynda. Megapolıs ákimi onyń jaı-kúıimen tanysty, óner ordasynnyń aınalasyn kúrdeli jańartý josparlanyp otyr. Sáýletshi Nellı Lapteva qala basshysyna aýmaqty bolashaqta kórkeıtý jobasyn usyndy. Joba aıasynda zamanaýı jaryq tartylyp, oıyn alańy ornatylady, átkenshegi bar pergola, yńǵaıly demalys oryndaryn qurý sekildi jumystar júrgizilmek.
Jobamen tanysý kezinde qala basshysy keńistikti teatr taqyrybyna saı bezendirýdiń mańyzdylyǵyna toqtaldy. Bul baǵytta Áýezov atyndaǵy Qazaq ulttyq drama teatry mańyndaǵy aýmaqtyń kórkemdelý úlgisi eskerilmek.
Sáýletshi bul tujyrymdamada balalarǵa arnalǵan oıyn elementteri men ınteraktıvti jaryq júıesi qarastyrylǵanyn atap ótti. Jaryq qurylǵylar qımyl-qozǵalys kezinde, adam júrgende avtomatty túrde janady.
Jumys saparynyń sońynda ákim Gogol kóshesindegi bir aýlaǵa bardy. Munda «Halyq qatysatyn búdjet» baǵdarlamasy aıasynda ınfraqurylym jańartylyp jatyr. Darhan Satybaldy turǵyndarmen tildesip, pikirin tyńdady. Almatylyqtar usynystarynyń eskerilgenin jáne jumystardyń sapasyna kóńili tolatynyn jetkizdi.