Múgedektigi bar adamdardy áleýmettik qoldaýy men olardyń ómir súrý sapasyn arttyrý memlekettik saıasattyń basty baǵyttarynyń biri bolyp tabylady. Bul týraly Óńirlik komýnıkasıalar qyzmetiniń brıfıńinde Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov málimdedi, dep habarlaıdy almaty-akshamy.kz
Onyń aıtýynsha, Almatyda múgedektigi bar 56,7 myń adam turady (I top - 5 813 adam, II top – 22 904 adam, III top. -18 856 adam, 18 jasqa deıingi múgedek balalar-9 112 adam).
Negizinen, múgedektigi bar adamdardy áleýmettendirý densaýlyǵy joq jandardyń múmkindikterin óteıtin tehnıkalyq kómekshi quraldarmen jáne ońaltýdyń áleýmettik qyzmetterimen ýaqtyly jáne ataýly qamtamasyz etý jolymen júzege asyrylady.
«2023 jylǵa 12,7 mlrd teńge bólindi. Múgedektigi bar adamdardy áleýmettik qoldaýǵa bólinetin qarjy qarajatynyń kólemi jyl saıyn artyp keledi (2020 jyly – 4,6 mlrd teńge, 2021 jyly – 5,2 mlrd teńge, 2022 jyly – 7,9 mlrd teńge)», – dedi Baýyrjan Jaýbasov.
Múgedektigi bar adamdar tehnıkalyq ońaltý quraldaryna óz betinshe tapsyrys bere alady.
«2023 jyly múgedektigi bar 39 774 adam jeke abılıtasıa jáne ońaltý baǵdarlamasynyń áleýmettik bóligine sáıkes tehnıkalyq quraldarmen jáne ońaltý qyzmetterimen qamtamasyz etý úshin júgindi, onyń ishinde 35 779 adam qajetti ońaltý quraldarymen jáne qyzmetterimen sátti qamtamasyz etildi, bul qamtylǵandardyń 90% -yn quraıdy. Josparly kórsetkish oryndaldy», - dep naqtylady spıker.
Ońaltý quraldarymen qamtamasyz etý áleýmettik qyzmetter portaly arqyly júzege asyrylady. Portalda qajetti qarajat bolmaǵan jaǵdaıda kórsetiletin qyzmetti alýshylardyń memlekettik satyp alý arqyly balamaly qamtamasyz etýdi tańdaýǵa quqyǵy bar.
Almaty qalasyn damytýdyń 2025 jylǵa deıingi baǵdarlamasynyń Jol kartasyn jáne 2030 jylǵa deıingi orta merzimdi perspektıvalardy iske asyrý sheńberinde «Almatyda ınklúzıvti orta qurý» bólimi boıynsha múgedektigi bar adamdardy memlekettik satyp alý arqyly jeke tapsyrys boıynsha ınovasıalyq (qymbat) tehnıkalyq ońaltý quraldarymen qamtamasyz etý jóninde sharalar qabyldandy.
«Ońaltýdyń ınovasıalyq tehnıkalyq quraldarymen 433 adam (150 adam jańa tehnologıa boıynsha protezdik-ortopedıalyq quraldarmen, 200 adam kreslo-arbamen, 76 adam sóıleý prosesorlarymen jáne 7 adam súıek ótkizgish estý apparattarymen) qamtamasyz etildi. 2024 jyly múgedektigi bar 288 adamǵa (1,4 mlrd teńge) ınovasıalyq ońaltý quraldary satyp alynady», – dep atap ótti basqarma basshysy.
Múgedektigi bar adamdarǵa jáne júrip-turýy qıyn, múgedektigi bar balalarǵa qosymsha «Invataksı» qyzmetteri usynylady, ol 100 avtokólikpen Memlekettik áleýmettik tapsyrys arqyly júzege asyrylady.
Almaty qalasynyń ákimi Erbolat Dosaevtyń tapsyrmasy boıynsha «Ten Qogam» múgedek adamdardy áleýmettik qoldaý ortalyǵy» áleýmettik jobasyn masshtabtaý boıynsha sharalar qabyldandy. Qala aýdandarynda 8 ortalyq ashyldy, onda 6 454 adam qyzmet aldy.
Almatyda kreslo-arbalardyń bólshekterin jóndeý jáne aýystyrý boıynsha tegin ortalyq jumys isteıdi, onda arbamen júretin 600 adamǵa qyzmet kórsetiledi.
Qazirgi zamanǵy shyǵarmashylyq tájirıbelerdiń komýnıkasıalyq múmkindikteri arqyly múgedek adamdardy áleýmettendirýdi jáne beıimdeýdi qamtamasyz etý, teń qoljetimdilik jáne ınklúzıa negizinde olardyń qabiletterin damytý úshin 2024 jyly kúnine 60 adamdy qamtı otyryp, «Áleýmettik ıntegrasıa ortalyǵy» áleýmettik jobasyn iske asyrý josparlanýda. Joba birneshe baǵytty qamtıdy: art-terapıa, teatr terapıasy, bı terapıasy, kitaphanaterapıasy, mýzykalyq terapıa, sýrettiń zamanaýı tehnologıalary jáne operatorlyq ónerdi meńgerý terapıasy.
Almatyda múgedektigi bar adamdar úshin qoljetimdi jáne kedergisiz orta qurý boıynsha jumystar josparly túrde júrgizilýde.
Spıker sondaı-aq múgedek adamdarǵa, múgedek balalarǵa, zeınetkerlerge, qıyn ómirlik jaǵdaıǵa tap bolǵan adamdarǵa stasıonar, jartylaı stasıonar, úıde qyzmet kórsetý jáne ýaqytsha bolý jaǵdaılarynda arnaýly áleýmettik qyzmetterdiń kepildik berilgen kólemin kórsetetin vedimistik baǵynysty 10 medısınalyq-áleýmettik mekemeniń qyzmeti týraly atap ótti.