Ótken jyly áleýmettik qoldaýmen 192 myńnan astam adam qamtyldy. Bul týraly Óńirlik komýnıkasıalar qyzmetiniń brıfıńinde Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov málimdedi, dep habarlaıdy almaty-akshamy.kz
Onyń aıtýynsha, az qamtylǵan halyqty qoldaý baǵyttarynyń biri áleýmettik kómektiń 17 túrin kórsetý bolyp tabylady. Áleýmettik kómektiń negizgi alýshylary ardagerler men olarǵa teńestirilgen adamdar, jalǵyzbasty zeınetkerler, múgedektigi bar adamdar, ómirlik qıyn jaǵdaıǵa tap bolǵan adamdar, áleýmettik mańyzy bar aýrýlardyń keıbir túrleri (týberkýlez, AITV-ınfeksıasy) bar adamdar bolyp tabylady.
Sondaı-aq, jyl saıyn áleýmettik kómektiń mólsheri qaıta qaralatynyn, sondaı-aq kómektiń jańa túrleri engiziletinin atap ótti.
«Qosymsha áleýmettik qoldaý maqsatynda Almaty qalasy máslıhatynyń qoldanystaǵy sheshimine ózgerister engizildi, onda 1986 jylǵy jeltoqsan oqıǵalaryna qatysýshylarǵa QR Táýelsizdik kúnine oraı birjolǵy áleýmettik kómek mólsheri 150 myń teńgeden 250 myń teńgege deıin ulǵaıtyldy. Bul kómekti jeltoqsan oqıǵasyna 676 qatysýshy aldy», - dedi Baýyrjan Jaýbasov.
Máselen, basqa memleketterdiń aýmaǵyndaǵy jaýyngerlik is-qımyldarǵa qatysqan ardagerleri úshin Keńes áskerleriniń shekteýli kontıngentin Aýǵanstannan shyǵarý kúnine 100 myń teńgeden jańa tólem engizildi. Osylaısha, basqa memleketterdiń aýmaǵyndaǵy jaýyngerlik is-qımyldardyń ardagerleri 200 myń teńge alady: 9 mamyr men 15 aqpan qarsańynda 100 myń teńgeden.
Budan basqa, 2024 jyldan bastap belgilengen kvotaǵa sáıkes jeltoqsan oqıǵasynyń aqtalǵan qatysýshylar (120 kvota boıynsha) jáne zeınetkerlik jasqa tolmaǵan basqa memleketter aýmaǵyndaǵy jaýyngerlik is-qımyldardyń muqtaj ardagerlerine (180 kvota boıynsha) jyl saıynǵy sanatorıı-kýrorttyq em usyný kózdelgen.
Sondaı-aq, 1986 jylǵy jeltoqsan oqıǵasynyń aqtalǵan qatysýshylary qalalyq qoǵamdyq kólikte tegin júrýge quqyly.
2024 jyly 2,9 myń aýǵan ardageri men 1986 jylǵy Jeltoqsan oqıǵasyna 700 qatysýshysyn (444 mln teńge) qosymsha áleýmettik qoldaý sharalarymen qamtamasyz etý josparlanýda.
Almatyda elektr energıasyna tarıftiń ósýine baılanysty halyqtyń áleýmettik osal toptary úshin ótemaqy ulǵaıtyldy.
«Investısıalarǵa aıyrbastaý tarıfi» baǵdarlamasy sheńberinde 2023 jylǵy shildeden bastap azamattardyń jekelegen 8 sanatyna - olar Uly Otan soǵysynyń ardagerleri, basqa memleketterdiń aýmaǵyndaǵy jaýyngerlik is-qımyldardyń ardagerleri, 1 jáne 2 toptaǵy múgedektigi bar adamdar, múgedek balalardy tárbıelep otyrǵan otbasylar, kóp balaly otbasylar, jasy boıynsha zeınetkerler jáne halyqtyń basqa da sanattary boıynsha 0,5 AEK (1725 teńge) mólsherinde áleýmettik kómek engizildi. Tólemdermen 133 myń adam qamtyldy. 2023 jylǵy qarashadan bastap atalǵan áleýmettik kómektiń mólsheri 0,6 AEK – ke (2 215 teńge) deıin ulǵaıtyldy jáne tólem merzimi 2024 jylǵy 30 maýsymǵa deıin uzartyldy», - dep naqtylady spıker.
Sonymen qatar, jan basyna shaqqandaǵy ortasha tabysy kedeılik sheginen tómen otbasylarǵa kórsetiletin ataýly áleýmettik kómekti (AÁK) 4 186 otbasy nemese 21 108 adam (2,2 mlrd teńge) aldy.
Kedeılik shegi toqsan saıyn eń tómengi kúnkóris deńgeıiniń 70% mólsherinde aıqyndalady (2024 jylǵy 1 toqsan: eń tómengi kúnkóris shegi – 52 136 teńge, kedeılik shegi – 36 495 teńge).
«2023 jyly áleýmettik kómek túrlerin 6,7 mlrd teńgege 192,7 myń adam aldy. 2024 jyly 23,6 myń az qamtylǵan azamatqa (2,5 mlrd teńgege) áleýmettik kómek kórsetý josparlanǵan», – dedi Baýyrjan Jaýbasov.