Almaty qalasy boıynsha Eńbek, áleýmettik qorǵaý jáne kóshi-qon departamentiniń basshysy Murat Muratbekov Óńirlik komýnıkasıalar qyzmetiniń brıfıńinde járdemaqynyń jańa túrin engizý týraly aıtty dep habarlaıdy almaty-akshamy.kz
Ol «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» QR Zańyna sáıkes erekshe qajettilikteri bar balany kútý kezeńin 18 jasqa deıin uzartý týraly sheshim qabyldanǵanyn habarlady. Muratbaevtyń pikirinshe, bul jasyna baılanysty zeınetaqy men bazalyq zeınetaqy taǵaıyndaýǵa oń áser etedi.
Zańda múgedektigi jáne asyraýshysynan aıyrylý jaǵdaıy boıynsha járdemaqylardy bir mezgilde alý quqyǵyn berý kózdeledi. Bul asyraýshysynan aıyrylǵan jáne quramynda múgedek balalary bar otbasylardyń tabys deńgeıin arttyrýǵa yqpal etedi.
- Buryn múgedektigi bar balalar ata-analary ajyrasqan kezde bir mezgilde alıment jáne múgedektigi boıynsha járdemaqy ala alatyn. Alaıda, bir nemese eki ata-ana qaıtys bolǵan jaǵdaıda, bala múgedektigi boıynsha járdemaqy ǵana nemese asyraýshysynan aıyrylý boıynsha járdemaqyny alatyn. Eki járdemaqyny bir mezgilde alý boıynsha zańdy quqyq bolǵan joq. Osy normanyń engizilýine baılanysty Almatyda erekshe qajettilikteri bar 290 bala asyraýshysynan aıyrylý boıynsha qosymsha 12 063 teńgeden 29 500 teńgege deıin járdemaqy alý quqyǵyna ıe boldy, - dep habarlady Murat Muratbaev.
Sondaı-aq memleket múgedek balalardy tárbıelep otyrǵan otbasylardyń bala kámeletke tolǵannan keıin turǵyn úıge kezekte turý quqyǵyn saqtaý týraly qamqorlyq jasady. Spıker atap ótkendeı, is júzinde otbasylar 10 jylǵa deıin turǵyn úı kezeginde tur. Buryn kámeletke tolǵan balalar kezekke qaıta turýǵa májbúr boldy. Bul norma eldegi 20 myńnan astam otbasyna baspana kezegin saqtaýǵa múmkindik beredi dep boljanýda.