«Qazaq bıznes kemp» jobasyn ashý josparlanyp otyr
Joba aıasynda shetelden kelgen qandas stýdentterge óz kásibin ashýǵa jáne ony qoldaýǵa múmkindik jasalmaq. Al bul ıgi bastamany «Otandastar Qory» qolǵa alyp otyr, dep habarlaıdy Almaty-akshamy.kz
Bul týraly elordada ótken qandas stýdenttermen kezdesý barysynda «Otandastar Qory» prezıdentiniń keńesshisi Dıdar Bolat málimdedi. Onyń aıtýynsha, shetelden keletin jastardyń basym kópshiligi oqýy aıaqtalǵannan keıin qaıtadan elden ketip jatady.
«Olar Qazaqstanda óz kásibin ashyp, ony damytýǵa bolatynyn bile bermeıdi nemese táýekelderden qorqady. Sondyqtan qandastardy qoldaýǵa arnalǵan taǵy bir jobany ázirleý ústindemiz», – deıdi maman.
«Bul baǵytty 2019 jyly bastaǵan bolatynbyz. Odan keıin pandemıaǵa tap bolyp, isti toqtattyq. Qazir qaıtadan qolǵa aldyq. Negizgi maqsatymyz – jastardyń bıznes ıdeıasyn qoldap, olarǵa Qazaqstandaǵy bıznes salasyndaǵy myqty azamattardy qosý», - deıdi «Otandastar Qory» KEAQ Prezıdentiniń keńesshisi Dıdar Bolat.
Aıta keteıik, búginde elimizdiń 20-ǵa jýyq JOO-da 7 myńdaı qandas stýdent bilim alady. Olardyń basym kópshiligi Mońǵolıa, Qytaı, Ózbekstan jáne Reseı memleketterinen kelgen.