«Qaýipsiz jol» jedel-aldyn alý is-sharasy aıasynda almatylyqtar joldaǵy qaýipsizdikti qamtamasyz etý úshin belsendi jumys istep jatyr.
Ásirese moped pen motokólik ıeleri erekshe nazarǵa alynǵan. 2025 jyldyń 5 sáýirinen bastap olarǵa qoıylatyn jańa ereje kúshine endi, dep habarlaıdy aqshamnews.kz.
Óńirlik komýnıkasıalar qyzmetinde ótken baspasóz-konferensıasynda, Almatydaǵy polısıa departamentiniń ókili Saltanat Ázirbek osylaı dep habarlady.
Saltanat Ázirbektiń aıtýynsha, endi moped júrgizetinder tıisti sanattaǵy júrgizýshi kýáligin, memlekettik tirkeý nómirin, tehnıkalyq pasport pen saqtandyrý polısin alyp, kóligin tehnıkalyq baıqaýdan ótkzýi tıis.
«Bulardy zańdy oryndaý úshin ǵana emes, adam ómirin aman saqtap qalý úshin de qolǵa alyp otyrmyz. Bul jol apatyn azaıtyp, tártipti kúsheıtýge baǵyttalǵan», - dep atap ótti Saltanat Ázirbek.
Onyń aıtýynsha, túsindirme jumysyn júrgizip jatqanymen, zań buzatyndar áli de azaımaı otyr. Sońǵy aptada Almatyda osyndaı 1,5 myńnan astam zań buzýshylyq tirkelipti. Onyń ishinde mopedin ýaqytyly tirkemegender, júrgizýshi kýáligi joqtar, kólikti mas bolyp júrgizgender men basqa da zań buzǵandary da bar.
Bulardan bólek, Almatyda osy mopedshilerdiń kesirinen 233 jol apaty bolyp, 243 adam zardap shekken. 500-ge jýyq moped aıyp turaǵyna qoıylǵan.
«Jolda abaılap júrmese bolmaıdy. Ol moped, mashına dep eshkimdi bólmeıdi. Sondyqtan jol júrý erejesin saqtaý – árkimniń azamattyq boryshy bolýy tıis», - dep qosty Saltanat Ázirbek.
Degenmen, zańǵa baǵynǵan 12 myńnan astam adam kólik quralyn zańdastyryp, memlekettik tirkeý nómirin, júrgizýshi kýáligin alyp, saqtandyrý polısin rásimdep úlgergen.
«Almatynyń polısıasy áli de reıdke shyǵyp, túsindirme jumysyn júrgizip jatyr. Bizdiń talap – qatań, biraq bári zań aıasynda bolmaq. Maqsatymyz – jol qatynasyn barynsha qaýipsiz qylý», - dep qorytty jıynnyń sońynda Saltanat Ázirbek.