Bostandyq aýdanynda ornalasqan atalǵan turǵyn úı kesheniniń aınalasyndaǵy jer daýy eki jyl buryn bastalǵan.
Jeti qabatty segiz turǵyn úı keshenindegi myńnan astam turǵynnyń baspanasyz qalý qaýpi bar, dep habarlaıdy Almaty-akshamy.kz Vecher.kz-ke silteme jasap.
Osy másele týraly shaǵymdanǵan turǵyndardyń sózinshe, bul kóp qabatty úıler 2016 jyly paıdalanýǵa berilgen. Qurylysty bir kezderi Qazkom bankinen nesıe alǵan «Mıras Park» JSHS salǵan.
«Bul bank «Halyq bankimen» birikken kezde, qurylys salýshynyń qaryzdary ǵana emes, barlyq aktıvteri de sol banktiń ıeligine ótti. Qurylys salýshynyń qaryzy úshin turǵyn úı keshenindegi satylmaǵan páterler men turǵyn úı kesheni ornalasqan jer telimderin alyp qoıǵan qarjy uıymy jer telimderin, zań talabyna sáıkes, turǵyndarǵa biriktirip bermegen. Bank osy aýmaqta turǵyn úı kesheni men turǵyn úılerge «jan beretin» ınfraqurylym men ınjenerlik jelilerdiń salynyp qoıǵanyna qaramastan, jer telimderin sata bastady», - deıdi «Mıras park» turǵyn úı kesheni turǵyndarynyń biri Anton Vıtalevıch.
Bul jerdegi áńgime toǵyz jer telimi týraly, bul degenimiz alty gektardan astam aýmaq. Jergilikti turǵyndardyń túsindirýinshe, keıinnen birge paıdalaný maqsatynda rásimdelgen jerdi qurylys salýshy bólek-bólek telim túrinde satyp alǵan, ol aımaqqa kóp páterli úıler salynǵanymen, qurylys ıesi jer telimderin biriktirýdi oılamaǵan.
«Urymtal sátti utymdy paıdalanǵan Halyq banki 2020 jyly jeke sot oryndaýshysy arqyly jer telimderiniń birin Tastanbekov degen azamatqa satyp jibergen, sonyń kesirinen biz bul aýmaqtyń bir bóliginen aıyrylyp qaldyq», - deıdi turǵyn úı kesheniniń taǵy bir turǵyny Gúlvıra Amanqosqyzy.
Onyń aıtýynsha, jer teliminiń jańa qojaıyny páter ıelerinen turǵyn úı kesheniniń qorshaýyn buzýdy talap ete bastaǵan. Ǵ. Tastanbekov turǵyn úı kesheniniń aldyndaǵy satyp alǵan jerine taýnhaýs salýdy kózdep otyr.
Eki jylǵa sozylǵan sot prosesinde «Mıras Park» turǵyn úı kesheniniń turǵyndary óz páterinde, óz aýmaǵynda turý men menshigin saqtap qalý úshin kúresýge májbúr bolǵan.
2021 jyly olar «Almaty qalasynyń qalalyq josparlaý jáne ýrbanıstıka basqarmasy» KMM-nen Tastanbekovtiń ótinishi týraly aqparat berýdi surap, jazbasha jaýap alǵan. Onda bylaı delingen:
«Jer telimi M-1 kanalynyń sý qorǵaý aımaǵynda, qudyqtary bar ınjenerlik jelilerde jáne arnaıy jasyl jelek aımaǵynda ornalasqandyqtan, Ǵ.S. Tastanbekovke nysannyń sáýlet-josparlaý tapsyrmasy berilmegen, óıtkeni ol jerde qurylys jumystaryn júrgizý qarastyrylmaǵan. Qazir jer telimi belgilengen maqsaty boıynsha ıaǵnı «Mıras Parki» MKK úshin paıdalanylýda, óıtkeni qurylys barysynda kórsetilgen jer teliminiń astyna barlyq ınjenerlik komýnıkasıalar jobalyq qujattamaǵa sáıkes júrgizildi. Munyń ústine kez kelgen nysandy salý Qazaqstan Respýblıkasynyń sáýlet, qala qurylysy jáne qurylys qyzmeti týraly zańnamasynyń talaptaryna qaıshy keledi jáne qatań tyıym salynady. Talapkerdiń shaǵymdanýshylarǵa qorshaýdy buz deýi de negizsiz».
Basqarýshy kompanıa men qurylys salýshyny jaýapker retinde kórsetken Ǵalymjan Tastanbekov aldymen aýdandyq sotqa, keıinnen qalalyq sotqa shaǵymdanǵan. Talap aryzy qanaǵattandyrylmaǵandyqtan, ol Joǵarǵy Sotqa shaǵymdanǵan.
«FM Group» JSHS qorshaý salyp tastaǵandyqtan, talapker menshik ıesi retinde óz jerin paıdalana almaı otyrǵanyn aıtady. Almaty qalasy Bostandyq aýdandyq sotynyń 2022 jylǵy 29 naýryzdaǵy sheshimi talap aryzdy qanaǵattandyrýsyz qaldyrdy. Almaty qalalyq sotynyń azamattyq ister jónindegi sot alqasynyń 2022 jylǵy 1 shildedegi qaýlysymen aýdandyq sottyń sheshimi ózgerissiz qaldyryldy», - delingen turǵyndar bizge kórsetken Joǵarǵy Sottyń 2022 jylǵy 6 aqpandaǵy uıǵarymynda.
Sondaı-aq sot sheshimi boıynsha, tutas qorshaýdyń bir aýmaq bolyp esepteletini, ony kútip ustaý páter ıeleriniń qarajaty esebinen júzege asyrylatyny aıtylǵan.
Sonymen qatar, jergilikti sottar AİJK-niń 72-babynyń talaptaryn eskere otyryp, talapkerdiń ózine tıesili jer ýchaskesin jaýapkerlerdiń ıelenetini týraly dáleldi aıǵaq usynbaǵanyn atap kórsetti.
Sot sheshimderimen kelispegen Ǵ. Tastanbekov Joǵarǵy Sotqa sot aktisin kasasıalyq tártipte qaıta qaraý týraly ótinishhat berdi. Sot tyńdaýy 28 aqpanda ótti.
Dál qazirgi ýaqytta «Mıras Park» turǵyn úı kesheni turǵyndarynyń aıtýynsha, bul jaǵdaıǵa jaýapty «Halyq banki» turǵyn úı kesheniniń aýmaǵynan jer telimderin bólip alyp, satýǵa shyǵaryp otyr...
Sarapshy pikiri
«Almaty» PIK qaýymdastyǵynyń tóraǵasy Arkadıı Rýbsov:
«Kóp páterli turǵyn úıdi nemese basqa nysandy salý, paıdalaný, kútip-ustaý úshin qajetti jer ýchaskesi kondomınıým obektisiniń quramyna kiretin úı-jaılardyń menshik ıeleriniń ortaq úlestik menshigine berilýi tıis. Ortaq úlestik menshik nemese jerdi paıdalaný quqyǵy irgeles jer ýchaskesine, ıaǵnı kóp páterli turǵyn úıdiń aınalasyn kórkeıtýge, kógaldandyrýǵa, sport, balalar alańdaryn, kirme joldardy, avtoturaqtar, trotýarlar, shaǵyn sáýlet nysandaryn ornalastyrýǵa arnalǵan aýmaqqa da tıesili. Sonymen qatar, eger kóp páterli turǵyn úıdiń ınjenerlik ınfraqurylymy jer ýchaskesinde ornalasqan bolsa, ıaǵnı komýnıkasıalar men ınjenerlik jeliler bolsa, mundaı jer ýchaskesin qurylys salýshy satyp alsa, jobalyq qujattamasyn ázirleý kezinde kóp páterli turǵyn úı salynatyny eskerilgen bolsa, onda qurylys salýshy jobalyq qujattamada kórsetilgen jer ýchaskelerin sózsiz biriktirýi kerek. Jańadan paıda bolǵan jer ýchaskesi kondomınıýmnyń menshigi sanalady. Eger qurylys salýshy arsyzdyqpen kóppáterli úıdiń aýmaǵyndaǵy jeke jer ýchaskesin satýǵa árekettense, onda bul qaıtalap satý jáne páter ıeleriniń múlki esebinen baıý retinde qarastyrylýy múmkin.»