Radıoelektronıka jáne baılanys áskerı-ınjenerlik ınstıtýtynyń oqý-jattyǵý ortalyǵynda áskerge shaqyrylýshylardyń ant qabyldaý rásimi saltanatty túrde ótti.
Sarbazdar áskerı ınstıtýttyń kúzeti men qorǵanysyna jaýap beretin rotada qyzmet etedi. Bir aılyq jas jaýynger kýrsynan úırengen olar Otanǵa adal qyzmet etýge jáne áskerı boryshyn laıyqty oryndaýǵa ant berdi, dep habarlaıdy Almaty-akshamy.kz Qorǵanys mınıstrligine silteme jasap.
İs-sharaǵa bilim ordasynyń jeke quramy, Qarýly kúshterdiń ardagerleri, áskerge qabyldanǵandardyń týǵan-týystary qatysty.
Quttyqtaý sózinde Radıoelektronıka jáne baılanys áskerı-ınjenerlik ınstıtýty bastyǵynyń orynbasary polkovnık Oırat Atykenov bul oqıǵanyń jas sarbazdar úshin mańyzdylyǵyn atap ótti.
– Búgin sender áskerı boryshtaryńdy laıyqty oryndaýǵa jáne
Otan qorǵaýǵa ant berdińder. Senderge jaýyngerlik daıyndyqta sáttilik tileımin. Áskerı qyzmet senderdiń ómirlik jáne kásibı josparlaryńdy júzege asyrýda senimdi bastama bolaryna senimdimin, – dedi ol.
Qatardaǵy jaýynger Sanjar Igen áskerı qyzmet týraly bylaı deıdi.
– Men áskerge óz erkimmen keldim, óıtkeni bul ózimdi shyńdap kórýge berilgen jaqsy múmkindik. Bul aı óte qarqyndy ótti, kóp nárseni úırendik, jańa ortaǵa beıimdeldik jáne júktelgen tapsyrmalardy oryndaýǵa daıynbyz. Menińshe, bir jyl tez aq ótedi", – dedi ol.
Saltanatty rásimniń sońynda sarbazdar áskerı bólim qonaqtaryna qoıan-qoltyq urys elementterin kórsetti. Sodan keıin áskerı orkestrdiń únimen saptyq alańda aldaǵy qyzmetke saqadaı saı ekenderin kórsete saltanatty marshpen júrip ótti.