Ortalyq-Ońtústik dálizine jatatyn respýblıkalyq mańyzy bar Astana-Almaty kúre jolynyń qurylysy aıaqtalýǵa jaqyn.
Qurylys jumystary aıasynda Qaraǵandy-Balqash, Balqash-Burylbaıtal, Burylbaıtal-Kúrti jáne Shamalǵan stansıasynyń aınalma joly jobalary júzege asyp jatyr. Bul joldyń jalpy uzyndyǵy – 946 shaqyrym, dep habarlaıdy Almaty-akshamy.kz Kólik mınıstrligine silteme jasap.
Ótken aptanyń sońynan beri Kólik mınıstri Marat Qarabaev qurylys jumystary júrip jatqan jol ýchaskeleriniń basynda. Mınıstr qurylysqa jaýapty merdiger uıymdardyń ókilderimen de kezdesýde.
Astana men Almaty arasyndaǵy joldyń qurylys sapasyn koreıalyq Dongsung Engineering jáne ISAN Corporation kompanıalary baqylaýǵa aldy. Kompanıa ınjenerleri tehnıkalyq qadaǵalaýdy júrgizip, únemi qurylys basynda.
Kólik mınıstrliginiń Avtomobıl joldary komıtetinde atap ótkendeı, ýchaskelerdiń bir bóligi jazdyń ortasynan bastap qoldanysqa berilse, qalǵan bóligi 2024 jyldyń sońyna deıin halyq ıgiligine tapsyrylady.
Máselen, jalpy uzyndyǵy 363 shaqyrymdy quraıtyn Qaraǵandy-Balqash kúre jolynyń boıynda aınalma joldar múldem qalǵan joq. Joba aıasynda 11 kópir, aýyl sharýashylyǵy tehnıkasynyń ótýi úshin arnalǵan 32 jol ótpesi, kólik aıryǵy jáne temir jol arqyly ótetin jol ótpesiniń qurylysy tolyq aıaqtaldy, qazir abattandyrý jumystary júrgizilýde. Sondaı - aq, jolshylar asfálttyń joǵarǵy qabatyn tósep, jol qozǵalysy qaýipsizdigin qamtamasyz etý úshin arnaıy tosqaýyl qorshaýlaryn ornatýda. Nysandy 2024 jyldyń qazan aıynda paıdalanýǵa berý kózdelip otyr.
Byltyr mamandar Balqash-Burylbaıtal kúre jolynyń jalpy uzyndyǵy 127 shaqyrymdy quraıtyn 3 ýchaskesin paıdalanýǵa tapsyrdy. Bıyl qalǵan 3 ýchaske qoldanysqa beriledi.
Jalpy uzyndyǵy 81 shaqyrymdy quraıtyn Kúrti-Burylbaıtal joly bıyl jazda tapsyrylady. Qazir mamandar jol boıynda abattandyrý jumystaryn júrgizýde. Sonymen qatar bıyl jazda Shamalǵan beketiniń aınalma joly da qoldanysqa berilmek.
Joǵaryda atalǵan jol ýchaskeleri I-b tehnıkalyq sanatyna sáıkes tórt jolaqty bolady.