Vaksına alýǵa kelgen Almaty halqyna merekelik kóńil-kúı syılaý maqsatynda túrli mádenı sharalar ótkizilip jatyr.
Búgin Almatyda QR Memlekettik rámizderi kúnine oraı sanıtarlyq talaptardyń saqtalýyn eskere otyryp, birqatar mádenı is-sharalar ótkizildi. Olar qalanyń vaksına jasaý pýnktterine merekelik kóńil-kúı syılaýda. Almaly aýdany ákimdiginiń qyzmetkerleri ekpe alǵan qala turǵyndaryna Qazaqstan týy beınelengen shokoladtardy taratý jaıly sheshim qabyldady, dep habarlaıdy Almaty-akshamy.kz
Aksıa azamattyq pen patrıotızmge, óz Otanyna degen súıispenshilikke tárbıeleý, eldiń memlekettik rámizderin qurmetteýdi qalyptastyrý, sondaı-aq olardyń máni men mańyzyn túsiný maqsatynda ótkizildi.
«Memlekettik rámizder - rýhanı kúsh-qýattyń qaınar kózi, árbir qazaqstandyq Tý, Eltańba men Ánurandy qasterleýi tıis. Bizdiń qalamyzda týdyń sımvolıkasy bar brendtik shokolad óndiriledi. Ol týraly dúnıe júzi biledi, sondyqtan biz vaksınaǵa qatysýshylarǵa shokolad syılap, merekemen quttyqtaýdy jón kórdik», - dedi Almaty qalasy Almaly aýdany ákiminiń orynbasary Aınur Bekjanova.
Ekpe alǵandarǵa Globus SOSO, «Mega» SOCO, «MBO» SÚ, Tóle bı boıynsha HQKO egý pýnktterinde 500-den astam shokolad taratyldy.
Syılyq alǵandardyń arasynda almatylyq Abdýl Ibragımov ta bar, ol búgin otandyq vaksına aldy.
«Biz memlekettik rámizderdi qurmettep, jastardy patrıotızmge tárbıeleýimiz kerek. Bul merekeni nasıhattaý jáne onyń tarıhyn aıtyp otyrý qajet. Men vaksına alýǵa kelip edim, quttyqtaýlardy kórip qýandym. Meniń oıymsha, vaksına alý jáne ujymdyq ımýnıtetti qalyptastyrý patrıotızmdi, óz eli men halqyna degen súıispenshilikti bildiredi. Biz birge indetti jeńýimiz kerek!» - dedi Abdýl Ibragımov.
Almatyda ótkiziletin is-sharalar arasynda saıabaqtar men skverler, jaıaý júrginshiler kósheleri, metro stansıalary men vagondary, SOSO, «Medeý» bıik taýly kesheni jáne «Shymbulaq» kýrorty aýmaǵynda, sondaı-aq «Kók-Tóbe» saıabaǵynda Memlekettik Ánuran bir mezgilde (saǵat 13.00-de) shyrqalady. Megapolıs turǵyndary men qonaqtaryn osy aksıaǵa qosylýǵa jáne Ánuran shyrqalǵan kezde barlyq tártip erejelerin saqtaı otyryp, Ánuran oryndaýǵa shaqyrady. Sonymen qatar, Almatyda baıkerler sherýi, sondaı-aq Respýblıka saraıy ǵımaratynyń aldynda orkestrdiń qatysýymen Memlekettik Ánuran oryndalady (saǵat 19.00).
Almatyda QR Memlekettik rámizderi kúnine oraı Almaty qalalyq jastar resýrstyq ortalyǵynyń elektrosamokattarynda «Meniń týym» atty fleshmob ótti. Almatydaǵy «Kırov» áskerı-patrıottyq klýbynyń músheleri Qazaqstannyń Memlekettik Týyn bıiktigi 3 680 metr Úlken Almaty shyńynda kóterip, dombyramen Qurmanǵazynyń shyǵarmalaryn oryndady.
