Almatylyq túlekterge atestattardy saltanatty túrde tapsyrý 2022 jyldyń 16-17 maýsymynda ótedi.
Almaty qalasy bilim basqarmasy basshysynyń orynbasary Qaırat Jumanov Óńirlik komýnıkasıalar qyzmetiniń brıfıńinde bıylǵy jyly megapolıste mektep bitirý qalaı ótetini týraly aıtyp berdi, dep habarlaıdy Almaty-akshamy.kz.
«25 mamyrda barlyq túlekter úshin sońǵy qońyraý soǵyldy. Bitirý is-sharalary – bul 11-synyp túlegi úshin onyń eresek ómirge qadam basýyndaǵy aıtýly oqıǵa», - dep atap ótti Qaırat Jumanov.
Ol atestattardy saltanatty tapsyrý 2022 jylǵy 16-17 maýsymda ótetinin habarlady.
«Almaty qalasynda atestatty mindetti túrde kúndizgi ýaqytta mektep qabyrǵasynda tapsyrý dástúri qalyptasqan, oǵan mekteptiń pedagogıkalyq ujymy, túlekter, túlekterdiń ata-analary, pedagogıkalyq eńbek ardagerleri, Qamqorshylyq keńes músheleri, Almaty qalasy bilim basqarmasynyń jáne basqa da múddeli memlekettik organdardyń ókilderi qatysady», - dep atap ótti spıker.
Q.Jumanov túlekterdiń qaıyrymdylyq bastamalaryn - «Mektepke kitap syıla», «Mektepke syı» - aǵash otyrǵyzý, áleýmettik osal otbasylar men balalarǵa kómek kórsetý úshin «Meıirimdi júrekten – balaǵa», «Týǵan jerge taǵzym» aksıalaryn qoldaıtynyn jetkizdi.
Pedagogıkalyq ádepti saqtaý jáne sybaılas jemqorlyq quqyq buzýshylyqtardyń aldyn alý maqsatynda mektep bitirý is-sharalaryna daıyndyq kezinde árbir túlekke jeke kózqaras qaǵıdaty saqtalady; bitirýshilerdiń ata-analarymen qajetsiz shyǵyndardyń orynsyzdyǵy týraly túsindirý jumystary júrgiziledi.
Almaty qalasy bilim basqarmasy basshysynyń orynbasary mektep bitirý keshine qoıylǵan tyıym týraly da eske saldy. Sonymen is-sharalardy ótkizýge anımatorlardy, merekelik agenttikterdi tartýǵa; merekelik ústelderdi uıymdastyrýǵa; avtomobılderdi jalǵa ala otyryp, qala boıynsha ekskýrsıalardy ótkizýge; ákimshilik pen pedagogtarǵa syılyqtar úshin aqshalaı qarjy jınaýǵa; meıramhanalar men kafelerde mektep bitirý is-sharalaryn uıymdastyrýǵa jol berilmeıdi.